दिव्य भारत बीएसएम न्यूज : दिनांक ३ ऑक्टोबर २०२५
नाशिक,( प्रतिनिधी : शाश्वत महाले):-

दसरा हा सण आनंद, ऐक्य आणि सद्भावनेचा मानला जातो. हाच सण अधिक अर्थपूर्ण करण्यासाठी “दिव्यशक्ती भागवत वेल्फेअर फाउंडेशन” या सामाजिक संस्थेने विशेष उपक्रम राबवला. पेठ रोडवरील म्हसोबावाडी( फुलेनगर) परिसरातील अतिशय गरीब वस्तीत राहणाऱ्या कुटुंबांना धान्य, कपडे, फळे व खाऊ यांचे वाटप करून या कुटुंबांच्या चेहऱ्यावर आनंद फुलविण्याचे काम संस्थेने केले.

      ३ ऑक्टोबर रोजी दसर्‍याच्या मुहूर्तावर हमालवाडी फुलेनगरमधील बस्तीमध्ये हा उपक्रम पार पडला. या कार्यक्रमावेळी फाउंडेशनचे अध्यक्ष डॉ. भागवत शंकर महाले व सरचिटणीस वैशाली भागवत महाले स्वतः उपस्थित होते. गरीब कुटुंबांना तांदूळ, केळी, फळे यांचे वाटप करण्यात आले. मुलांसाठी व महिलांसाठी खाऊ, बिस्किटे, गोडधोड पदार्थ देण्यात आले. उपयुक्त कपड्यांच्या कपडा बँके मधून जिन्स पॅन्ट, शर्ट, टी-शर्ट व महिलांसाठीचे कपडे यांचे वितरण करण्यात आले. या वस्तीत वास्तव्यास असणारे अनेक नागरिक साधारण गच्चीवर झोपतात, त्यांच्याकडे चांगले कपडे नाहीत, अन्नाची टंचाई आहे. त्यांच्यासाठी हा उपक्रम मोठा दिलासा ठरला.

     ✦ सामाजिक जाणिवेतून उपक्रम:  डॉ. भागवत महाले यांनी या वेळी बोलताना सांगितले :  “दिव्यशक्ती भागवत वेल्फेअर फाउंडेशन” हे केवळ एक संस्था नसून जनतेच्या प्रश्नांवर कायमस्वरूपी उत्तर शोधण्याचा प्रयत्न आहे.  समाजातील उपेक्षित, वंचित घटकांसाठी छोटासा का होईना पण मदतीचा हात पुढे करणे, हेच आमचे ध्येय आहे.”

        सरचिटणीस श्रीमती वैशाली महाले यांनी सांगितले : “या गरीब वस्तीतल्या नागरिकांसाठी आम्ही फक्त धान्य वा कपडे दिले असे नाही, तर त्यांना मानवी आपुलकीची जाणीव करून दिली आहे. त्यांच्या चेहऱ्यावर उमटलेले समाधानच आमच्यासाठी खरी संपत्ती आहे.”

      फाउंडेशनची स्थापना आणि कार्य: दिव्यशक्ती भागवत वेल्फेअर फाउंडेशनची स्थापना १६ जून रोजी झाली. अल्पावधीतच या संस्थेने सामाजिक क्षेत्रात नवा आदर्श निर्माण केला आहे. संस्था पुढील क्षेत्रांमध्ये काम करण्याचा निर्धार व्यक्त करते : शैक्षणिक मदत : गरीब व गरजू विद्यार्थ्यांना शालेय दप्तर, वह्या, पुस्तके व शैक्षणिक साहित्य वाटप करणे, आरोग्य सेवा : ग्रामीण व शहरी भागात आरोग्य शिबिरे, रक्तदान शिबिरे, मोफत तपासणी शिबिरे. पर्यावरण संवर्धन : वृक्षारोपण मोहिमा, स्वच्छता अभियान, रोजगाराभिमुख उपक्रम : सुशिक्षित बेरोजगार युवकांना कौशल्य विकास प्रशिक्षण व रोजगार उपलब्ध करून देणे. सामाजिक प्रश्न सोडवणे : पाणी, रस्ते, वीज, आरोग्य, कौटुंबिक व सामाजिक प्रश्नांवर स्थानिक पातळीवर मार्ग काढणे. गरजूंना दिलासा  : लाभार्थ्यांचे अनुभव: या उपक्रमात लाभार्थी म्हणून आलेल्या महिलांनी व पुरुषांनी दिलेला प्रतिसाद हृदयस्पर्शी होता. 

नागरिक म्हणाले : “आजपर्यंत आम्हाला अशा प्रकारची मदत मिळाली नव्हती. आमच्या मुलांना खाऊ, बिस्किटे आणि कपडे मिळाल्यामुळे त्यांचा आनंद शब्दात मावणार नाही.”
महिला लाभार्थी म्हणाल्या : “दसऱ्याच्या मुहूर्तावर आमच्यासारख्या गरीब लोकांना कपडे आणि धान्य मिळाले. आमच्या घरी जेवणाची सोय झाली. आम्ही संस्थेचे मनःपूर्वक आभारी आहोत.” गावकऱ्यांनी एकच सूर लावला की – अशा प्रकारचे उपक्रम सातत्याने राबवले गेले तर खऱ्या अर्थाने समाजातील विषमता कमी होईल.

      पुढील वाटचाल : दूरदृष्टी आणि नियोजन: फाउंडेशनकडून आगामी काळात अनेक सामाजिक प्रकल्प राबवण्याचे नियोजन आहे :

गरजू विद्यार्थ्यांना मोफत शालेय दप्तर वाटप, ग्रामीण भागात मोफत आरोग्य शिबिरे ,बेरोजगार युवकांना रोजगार हमी व कौशल्य विकास प्रशिक्षण, सुरगाणा, पेठ, त्र्यंबकेश्वर, दिंडोरी, कळवण, इगतपुरी, सटाणा आदी आदिवासी भागात युवकांना कौशल्य आधारित प्रशिक्षण, समाजातील विविध प्रश्नांवर (पाणी, वीज, रस्ते, शिक्षण) प्रशासनाशी सातत्याने संवाद साधून समस्यांचे निराकरण करणे आदि कामे करण्यात येणार आहेत.

✦ नागरिकांचा विश्वास आणि आभार प्रदर्शन: कार्यक्रमाच्या शेवटी म्हसोबावाडी( फुलेनगर)येथील नागरिकांनी संस्थेचे मनःपूर्वक आभार मानले. त्यांनी म्हटले की–“आजपर्यंत अनेक संस्था आल्या, आश्वासने दिली, पण प्रत्यक्ष मदत मिळाली नाही. मात्र “दिव्यशक्ती भागवत वेल्फेअर फाउंडेशन” ने आमच्या वस्तीत येऊन आम्हाला मदत केली. हे आम्ही कधीही विसरणार नाही.”

दसर्‍याच्या शुभदिनी राबविण्यात आलेला हा उपक्रम फक्त एक मदतवाटप नव्हता, तर समाजातील सर्वात दुर्बल घटकांना आपलेपणाची जाणीव करून देणारा एक सामाजिक संदेश होता. दिव्यशक्ती भागवत वेल्फेअर फाउंडेशनने केलेले हे कार्य समाजातील इतर संस्थांसाठी आदर्श ठरेल यात शंका नाही. गेल्या काही वर्षांपासून समाजातील विषमता वाढत चालली आहे. अशा वेळी गरीब व गरजूंसाठी पुढे येणाऱ्या अशा संस्थाच खऱ्या अर्थाने समाजाचा आधार ठरतात. डॉ. भागवत महाले व वैशाली महाले यांच्या पुढाकारामुळे हा उपक्रम यशस्वी झाला. एकंदरित, “आनंद वाटल्याने वाढतो” हा “दिव्य संदेश” या उपक्रमातून पुन्हा अधोरेखित झाला.

दिव्य भारत बीएसएम न्यूज :
नाशिक प्रतिनिधी : शाश्वत महाले