दिव्य भारत बीएसएम न्यूज : दि. 31 ऑक्टोबर 2025
पळसण ( सुरगाणा) प्रतिनिधी : हिरामण चौधरी ):-

सुरगाणा तालुक्यातील अतिदुर्गम भागातील पिंपळसोंड येथील फरशीपूल गेल्या महिनाभरापासून पुरात वाहून गेल्याने स्थानिक नागरिक, विद्यार्थी, रुग्ण, गर्भवती महिला आणि पर्यटकांना जीव मुठीत धरून प्रवास करावा लागत आहे. प्रशासनाच्या निष्क्रीयतेमुळे लोकांमध्ये तीव्र संताप असून रस्ते बांधकाम विभागाच्या निष्क्रिय भूमिकेवर तीव्र नाराजी व्यक्त केली जात आहे.

💧 पुरामुळे वाहून गेलेला पूल – जीवनदायी मार्ग ठप्प

दिनांक 23 सप्टेंबर रोजी पहाटे तीन वाजण्याच्या सुमारास झालेल्या प्रचंड मुसळधार पावसामुळे नार, पार, गिरणा, वाझडी, तान, मान, पिंपळसोंड या परिसरातील नद्या – विशेषतः कावेरी, अंबिकेची उपनदी कुंभारचोंड आणि भुतकुड्याचा ओहळ – यांनी धोक्याची पातळी ओलांडली. त्या पुराच्या पाण्यात पिंपळसोंड येथील पाईप मोरी पूर्णपणे वाहून गेली.या मार्गावरून सुरगाणा, वासदा व अन्य गावांना जाणारे शेकडो लोक आता जीव धोक्यात घालून पाण्यावरून जाण्यास भाग पाडले गेले आहेत. पूल कोसळल्यानंतर आतापर्यंत रस्ते बांधकाम विभागाने कोणतीही दुरुस्ती अथवा तात्पुरती सुविधा उपलब्ध करून दिलेली नाही.

🛑 नागरिकांचा संताप – “रस्ता नाही, तर जीव धोक्यात ठेवून प्रवास!”:

या रस्त्यावरून मोठी वाहने तर सोडाच, पण दुचाकी आणि छोट्या चारचाकी वाहनांनाही जाणे अशक्य झाले आहे. पावसाळ्यानंतरही खड्ड्यात पाणी साचल्याने आणि रस्ता खचल्याने अनेक वेळा दुचाकीस्वार अपघातग्रस्त झाले आहेत. रात्रीच्या वेळी हा खड्डा चालकांच्या नजरेत न आल्याने काहींना गंभीर दुखापत झाली आहे.

स्थानिक ग्रामस्थांनी सांगितले की, “गर्भवती महिलांना प्रसुतीसाठी वासदा किंवा सुरगाणा येथे नेण्यासाठी खाजगी वाहनांतून धोकादायक प्रवास करावा लागतो. रस्ता इतका खोल खचला आहे की प्रत्येक वेळी जीव धोक्यात टाकावा लागतो.”

🧱 तातडीने दुरुस्तीची मागणी :

ग्रामस्थांनी वारंवार लेखी तक्रारी दिल्या असून, तातडीने फरशीपूल दुरुस्त करून खड्डा बुजवावा, मुरूम व दगड टाकून मार्ग सुरळीत करावा अशी मागणी केली आहे. परंतु रस्ते बांधकाम विभागाकडून अद्याप कोणतीही कारवाई झालेली नाही.

पिंपळसोंड व आसपासच्या साखळचोंड, तातापाणी, वाॅटरफॉल भागात दिवाळी सुट्टीच्या काळात गुजरात राज्यातून शेकडो पर्यटक भेट देतात. मात्र रस्त्यावरील या धोकादायक परिस्थितीमुळे पर्यटकांना अडचणींना सामोरे जावे लागत आहे. त्यांच्या वाहनांना मोठ्या खड्ड्यात फसावे लागते, परिणामी स्थानिक पर्यटनावरही विपरित परिणाम होत आहे.

🚜 प्रशासनाची ढिसाळ भूमिका:

स्थानिकांच्या म्हणण्यानुसार, “रस्ते बांधकाम विभाग झोपेचे सोंग घेत आहे. अधिकारी भेट देतात, फोटो काढतात आणि निघून जातात. परंतु प्रत्यक्षात काहीही काम होत नाही. जिल्हा परिषद आणि सार्वजनिक बांधकाम विभागाने तातडीने लक्ष घालावे अन्यथा आंदोलनाचा इशारा दिला आहे.”

🗣️ नागरिकांची तीव्र प्रतिक्रिया :

श्री. शिवराम चौधरी (माजी सैनिक, पिंपळसोंड) यांनी सांगितले –

“आम्ही गुजरात सीमेजवळील अतिदुर्गम भागात राहतो. एकीकडे बुलेट ट्रेन, समृद्धी महामार्ग, वंदे भारत अशा आधुनिक सोयीसुविधा सुरू आहेत, पण आम्हाला साधा रस्ताही मिळत नाही. आमच्या भागात आरोग्यसेवा, वीज, दळणवळण या सुविधा अपुऱ्या आहेत. त्यामुळे काही वेळा आम्ही उपचारांसाठी गुजरात राज्यात जातो. निदान हा पूल तरी लवकरात लवकर दुरुस्त करावा, हीच आमची अपेक्षा आहे. प्रशासनाकडून काहीच प्रतिसाद नाही म्हणूनच आम्हाला ‘गुजरातमध्ये जोडा’ अशी मागणी करावी लागते.”

📍परिस्थितीचे गांभीर्य :

पिंपळसोंड ते खुंटविहीर दरम्यानच्या या मार्गावरून दररोज शालेय विद्यार्थी, कामगार, शेतकरी, आरोग्यसेवक आणि व्यापारी प्रवास करतात. पूल वाहून गेल्याने केवळ वाहतुकीचाच प्रश्न नाही, तर आपत्कालीन आरोग्यसेवा आणि शैक्षणिक सोयींवरही परिणाम झाला आहे.

🛠️ ग्रामस्थांची मागणी :

1. फरशीपूल तातडीने दुरुस्त करावा.
2. पर्यटक व स्थानिकांच्या सुरक्षेसाठी चेतावणी फलक व पर्यायी मार्ग उपलब्ध करून द्यावा.
3. रस्ता बांधकाम विभागाच्या अधिकाऱ्यांवर चौकशी करून जबाबदारी निश्चित करावी.
4. ग्रामस्थांना तात्पुरती वाहतूक सुविधा उपलब्ध करून द्यावी

एकीकडे विकासाच्या गप्पा आणि मोठ्या योजनांचे फलक झळकत असताना दुसरीकडे पिंपळसोंडसारख्या आदिवासी भागात लोकांना मूलभूत रस्ता सुविधा न मिळणे ही शासन यंत्रणेची गंभीर अपयशाची बाब आहे. नागरिकांच्या जीवाशी खेळणाऱ्या या परिस्थितीला तातडीने पूर्णविराम देऊन पूल पुन्हा उभारला गेला नाही, तर ग्रामस्थ रस्त्यावर उतरतील, असा इशारा स्थानिकांनी दिला आहे.

📸 फोटो – पिंपळसोंड ते खुंटविहीर या रस्त्यावर पुरामुळे वाहून गेलेल्या फरशीपुलावर निर्माण झालेला भला मोठा खड्डा; नागरिकांचा जीव धोक्यात टाकून प्रवास.

---

📰 दिव्य भारत बीएसएम न्यूज
पळसण ( सुरगाणा) प्रतिनिधी : हिरामण चौधरी )
📅 दि. 31 ऑक्टोबर 2025
✍️ संपादक – डॉ. भागवत महाले
📞 संपर्क: +91 8208180510
🌐 Website: divyabharatbsmnews.com