दिव्य भारत बी एस न्यूज : दिनांक : 01 फेबवारी 2026

हजरत जमादार बाबा दर्गा परिसरात कचऱ्याचे साम्राज्य; दुर्गंधीने नागरिक त्रस्त – येडशी ग्रामपंचायतीच्या दुर्लक्षावर संताप

येडशी (ता. धाराशिव) | प्रतिनिधी : सुभान शेख | दि. 31 ऑगस्ट

धाराशिव तालुक्यातील सुमारे पंचवीस हजार लोकसंख्या असलेल्या येडशी गावात स्वच्छतेचा गंभीर प्रश्न पुन्हा एकदा ऐरणीवर आला आहे. गावातील जनता विद्यालय शाळेपासून ग्रामपंचायत कार्यालयाकडे जाणारा मुख्य प्रभातफेरी मार्ग, जो रोज शेकडो नागरिक वापरतात, त्या रस्त्याच्या कडेला असलेल्या हजरत जमादार बाबा दर्गा परिसरात मोठ्या प्रमाणात कचऱ्याचे ढीग साचले आहेत. परिणामी परिसरात तीव्र दुर्गंधी पसरली असून भाविक, महिला, ज्येष्ठ नागरिक व विद्यार्थी यांना मोठ्या अडचणींचा सामना करावा लागत आहे.

दर्शनासाठी येणाऱ्यांची गैरसोय:

हजरत जमादार बाबा दर्गा हे येडशी गावातील श्रद्धास्थान आहे. दररोज पहाटेपासून संध्याकाळपर्यंत भाविक दर्शनासाठी येथे येत असतात. मात्र दर्ग्याच्या समोरच घरगुती कचरा, खरकटे अन्न, प्लास्टिक पिशव्या, ओला-सुका कचरा टाकला जात असल्याने परिसरात दुर्गंधीचे साम्राज्य निर्माण झाले आहे. दर्शनासाठी येणाऱ्या नागरिकांना नाक दाबून जावे लागते, तर काही वेळा कचऱ्यामुळे रस्ता अरुंद झाल्याने वाहतुकीलाही अडथळा निर्माण होतो.

महिलांकडून कचरा टाकण्याचा प्रकार:

स्थानिक नागरिकांच्या म्हणण्यानुसार, पहाटेच्या सुमारास काही महिला घरातील कचरा थेट दर्गा परिसरात आणून टाकतात. यामुळे कचऱ्याचे ढीग दिवसेंदिवस वाढत जातात. एकदा कचरा साचला की इतर नागरिकही तिथेच कचरा टाकू लागतात आणि काही दिवसांतच संपूर्ण परिसर अस्वच्छ बनतो.

यापूर्वीही झाली होती कारवाई, पण तात्पुरती:

या समस्येबाबत यापूर्वीही दिव्य भारत बीएसएम न्यूजच्या माध्यमातून आवाज उठवण्यात आला होता. 4 नोव्हेंबर रोजी “येडशी ग्रामपंचायतीचा कचराकांड – हजरत जमादार बाबा दर्गा परिसरात घाणीचे साम्राज्य, नागरिक त्रस्त” अशी बातमी प्रकाशित झाल्यानंतर घंटागाडीच्या गुत्तेदाराने तातडीने दखल घेत कचरा हटविला होता. मात्र ही कारवाई तात्पुरती ठरली. कचरा हटवल्यानंतर अवघ्याच दुसऱ्या दिवसापासून पुन्हा त्या ठिकाणी कचरा टाकण्यास सुरुवात झाली.

घंटागाडीचा प्रश्न आणि ग्रामपंचायतीची भूमिका:

पत्रकारांनी पुन्हा कचऱ्याचे ढीग पाहून संबंधित गुत्तेदाराशी संपर्क साधला असता, गुत्तेदाराने सांगितले की ग्रामपंचायतीने त्यांना घंटागाडीच्या कामावरून काढून टाकले आहे. त्यामुळे कचरा उचलण्याशी आता त्यांचा काहीही संबंध नाही. या घटनेनंतर एक गंभीर प्रश्न निर्माण झाला आहे—जर ग्रामपंचायतीने गुत्तेदाराला कामावरून काढले असेल, तर येडशी गावातील कचरा उचलण्याची जबाबदारी सध्या कोणाची आहे? आणि दर्गा परिसरातील साचलेला कचरा हटविणार कोण?

स्वच्छता अभियान केवळ कागदावर?

महाराष्ट्र शासनाकडून ग्रामस्वच्छता अभियान, स्वच्छ भारत अभियान अशा अनेक योजना राबविल्या जात आहेत. मात्र येडशीसारख्या मोठ्या गावात जर मुख्य रस्त्यालगत, धार्मिक स्थळासमोर कचऱ्याचे ढीग साचलेले असतील, तर या योजनांचा प्रत्यक्षात उपयोग काय, असा प्रश्न नागरिक उपस्थित करत आहेत. ग्रामपंचायतच जर स्वच्छतेकडे दुर्लक्ष करत असेल, तर गाव स्वच्छ कसे राहणार?

आरोग्याचा धोका वाढला:

कचऱ्याच्या ढिगाऱ्यांमुळे केवळ दुर्गंधीच नव्हे, तर डास, माश्या, उंदीर यांचा प्रादुर्भाव वाढत आहे. यामुळे साथीचे आजार पसरण्याची भीती नागरिक व्यक्त करत आहेत. विशेषतः लहान मुले, वृद्ध आणि आजारी व्यक्तींना याचा मोठा त्रास सहन करावा लागत आहे.

नागरिकांच्या मागण्या:

येडशीतील नागरिक व सामाजिक कार्यकर्त्यांनी ग्रामपंचायतीकडे पुढील मागण्या केल्या आहेत—

1. हजरत जमादार बाबा दर्गा परिसरातील कचरा तातडीने हटवावा.
2. नियमित कचरा उचलण्यासाठी घंटागाडीची व्यवस्था त्वरित सुरू करावी.
3. दर्गा परिसरात “येथे कचरा टाकू नये” असे स्पष्ट फलक लावावेत.
4. कचरा टाकणाऱ्यांवर किमान दोन हजार रुपयांचा दंड आकारावा.
5. स्वच्छतेबाबत ग्रामस्थांमध्ये जनजागृती मोहीम राबवावी.

ग्रामपंचायतीने तातडीने दखल घ्यावी

हजरत जमादार बाबा दर्गा परिसरातील ही समस्या केवळ स्वच्छतेपुरती मर्यादित नसून, ती गावाच्या आरोग्य, श्रद्धा आणि प्रतिष्ठेशी संबंधित आहे. वारंवार तक्रारी होऊनही जर ठोस उपाययोजना होत नसतील, तर ग्रामपंचायतीच्या कार्यक्षमतेवर प्रश्नचिन्ह निर्माण होते. त्यामुळे येडशी ग्रामपंचायतीने तातडीने दखल घेऊन कायमस्वरूपी उपाययोजना कराव्यात, अशी जोरदार मागणी नागरिकांकडून होत आहे.

जर वेळेत कारवाई झाली नाही, तर ग्रामस्थ आंदोलनाचा मार्ग स्वीकारतील, असा इशाराही काही नागरिकांनी दिला आहे. आता येडशी ग्रामपंचायत या गंभीर प्रश्नाकडे कधी आणि कसा लक्ष देते, याकडे संपूर्ण गावाचे लक्ष लागले आहे.

दिव्य भारत बी एस न्यूज : दिनांक : 01 फेबवारी 2026