मुंबई-अहमदाबाद महामार्गावरील समस्यांबाबत आ. विलास तरे आक्रमक

दिव्य भारत बीएसएम न्यूज : सोमवार, दिनांक : ८ जून २०२६

पादचारी उड्डाणपूल, सुरक्षितता उपाययोजना व रस्ते दुरुस्तीची NHAI कडे जोरदार मागणी

पालघर /नवी मुंबई / वसई (प्रतिनिधी :बाळकृष्ण ढोके ):-
मुंबई-अहमदाबाद राष्ट्रीय महामार्ग क्र. ४८ वरील वाढत्या वाहतूक कोंडी, अपघातांचे प्रमाण, पादचाऱ्यांच्या सुरक्षिततेचा प्रश्न आणि पायाभूत सुविधांच्या अभावामुळे नागरिकांमध्ये तीव्र नाराजी व्यक्त होत असताना, बोईसर विधानसभा मतदारसंघाचे आमदार विलास तरे यांनी या गंभीर प्रश्नांची दखल घेत भारतीय राष्ट्रीय महामार्ग प्राधिकरणाच्या (NHAI) वरिष्ठ अधिकाऱ्यांची भेट घेतली. मुख्य महाव्यवस्थापक (तांत्रिक) तथा प्रादेशिक अधिकारी अंशुमाली श्रीवास्तव यांना लेखी निवेदन सादर करून महामार्गावरील विविध समस्या तातडीने सोडविण्याची मागणी त्यांनी केली.

मुंबई-अहमदाबाद राष्ट्रीय महामार्ग हा देशातील अत्यंत महत्त्वाचा आणि वर्दळीचा मार्ग मानला जातो. औद्योगिक, व्यापारी तसेच प्रवासी वाहतुकीसाठी या मार्गाचा मोठ्या प्रमाणात वापर केला जातो. मात्र, गेल्या काही वर्षांपासून या महामार्गावरील वाढती वाहतूक, अपुऱ्या सुविधा आणि सुरक्षिततेच्या उपाययोजनांचा अभाव यामुळे अनेक गंभीर अपघात घडत असल्याचे चित्र आहे.याच पार्श्वभूमीवर आ. विलास तरे यांनी पालघर तालुक्यातील मौजे हलोली-पाडोसपाडा, वसई तालुक्यातील शिरसाड-भांबटपाडा तसेच ब्रह्मा सेल पेट्रोल पंप परिसरातील नागरिकांच्या समस्यांकडे विशेष लक्ष वेधले. या भागांमध्ये महामार्गाच्या दोन्ही बाजूंना मोठ्या प्रमाणावर वस्ती असून शालेय विद्यार्थी, महिला, ज्येष्ठ नागरिक आणि रुग्णांना रस्ता ओलांडताना जीव मुठीत धरून प्रवास करावा लागत असल्याचे त्यांनी निदर्शनास आणून दिले.

या ठिकाणी अनेकदा किरकोळ तसेच गंभीर अपघात घडल्याची उदाहरणे देत आ. तरे यांनी तातडीने पादचारी उड्डाणपूल किंवा सुरक्षित अंडरपास उभारण्यात यावेत, अशी मागणी केली. याशिवाय वसई (ससूनवघर) ते तलासरी (आच्छाड) या संपूर्ण पट्ट्यात सविस्तर सर्वेक्षण करून ज्या ठिकाणी लोकवस्ती आणि शैक्षणिक संस्था आहेत, तेथे आवश्यकतेनुसार पादचारी उड्डाणपूल उभारण्याचे नियोजन करण्यात यावे, असेही त्यांनी सुचविले.बैठकीदरम्यान त्यांनी महामार्गावरील रस्त्यांच्या दुरवस्थेचा मुद्दाही जोरकसपणे मांडला. अनेक ठिकाणी रस्त्यांचा पृष्ठभाग उखडलेला असून काही भागांत रस्ते असमान झाले आहेत. त्यामुळे वाहनचालकांना मोठा त्रास सहन करावा लागत असून अपघातांचा धोका वाढत आहे. विशेषतः पावसाळ्याच्या काळात खड्डे आणि पाणीसाठा यामुळे परिस्थिती अधिक गंभीर बनत असल्याचे त्यांनी सांगितले.

याशिवाय वारंवार निर्माण होणारी वाहतूक कोंडी, अपघातप्रवण ठिकाणी अपुऱ्या सुरक्षितता उपाययोजना, आपत्कालीन मदत केंद्रांचा अभाव आणि वाहतूक व्यवस्थापनातील त्रुटी याकडेही त्यांनी NHAI प्रशासनाचे लक्ष वेधले. महामार्गावरील महत्त्वाच्या चौकांमध्ये वाहतूक नियोजन अधिक प्रभावी करणे, आवश्यक त्या ठिकाणी सिग्नल यंत्रणा उभारणे, दिशा दर्शविणारे फलक बसविणे तसेच रस्त्यांच्या रुंदीकरणाची कामे हाती घेण्याची मागणी त्यांनी स्थानिक नागरिकांच्या वतीने केली.स्थानिक ग्रामस्थ, सामाजिक संस्था आणि वाहनचालकांकडून सातत्याने येणाऱ्या तक्रारींचा उल्लेख करत आ. तरे म्हणाले की, विकासाच्या दृष्टीने हा महामार्ग महत्त्वाचा असला तरी नागरिकांच्या सुरक्षेशी कोणतीही तडजोड होता कामा नये. पादचाऱ्यांना सुरक्षित मार्ग उपलब्ध करून देणे ही प्रशासनाची जबाबदारी आहे. त्यामुळे लोकहिताच्या दृष्टीने या मागण्यांवर तातडीने सकारात्मक निर्णय घेण्यात यावा.

यावेळी भारतीय राष्ट्रीय महामार्ग प्राधिकरणाचे मुख्य महाव्यवस्थापक (तांत्रिक) तथा प्रादेशिक अधिकारी अंशुमाली श्रीवास्तव यांनी आमदार तरे यांच्या निवेदनाची दखल घेत आवश्यक कार्यवाही करण्याचे आश्वासन दिले. त्यांनी सांगितले की, भारतीय तंत्रज्ञान संस्था (IIT) मुंबई यांनी या मार्गासंदर्भात सादर केलेल्या अभ्यास अहवालाच्या आधारे विविध सुधारणा प्रस्तावित करण्यात आल्या आहेत. त्यानुसार आवश्यक अनुपालन प्रक्रिया सुरू असून संबंधित बाबींचा गांभीर्याने विचार केला जात आहे.तसेच त्यांनी माहिती दिली की, मुंबई-वडोदरा द्रुतगती महामार्गावरील वाहतूक पूर्ण क्षमतेने सुरू झाल्यानंतर राष्ट्रीय महामार्ग क्र. ४८ वरील वाहतुकीचा ताण लक्षणीयरीत्या कमी होण्याची अपेक्षा आहे. त्यानंतर वाहतुकीचे नव्याने नियोजन करून आवश्यक दुरुस्ती, पायाभूत सुविधा विकास आणि सुरक्षितता उपाययोजनांना प्राधान्य देण्यात येईल.

दरम्यान, आ. विलास तरे यांनी या विषयाचा सातत्याने पाठपुरावा करण्याचा निर्धार व्यक्त केला असून नागरिकांच्या सुरक्षिततेशी संबंधित प्रश्न सुटेपर्यंत प्रयत्न सुरू ठेवणार असल्याचे स्पष्ट केले. स्थानिक ग्रामस्थांनीही त्यांच्या या पुढाकाराचे स्वागत केले असून महामार्गावरील मूलभूत सुविधा आणि सुरक्षितता उपाययोजना लवकरात लवकर पूर्ण करण्याची अपेक्षा व्यक्त केली आहे.मुंबई-अहमदाबाद राष्ट्रीय महामार्गावरील वाढत्या अपघातांच्या पार्श्वभूमीवर आ. विलास तरे यांनी घेतलेली ही पुढाकाराची भूमिका महत्त्वाची मानली जात असून, संबंधित प्रशासनाने तातडीने सकारात्मक निर्णय घेतल्यास हजारो नागरिकांच्या सुरक्षित प्रवासाला मोठा दिलासा मिळू शकतो, अशी भावना परिसरातील नागरिक व्यक्त करत आहेत.

दिव्य भारत बीएसएम न्यूज : सोमवार, दिनांक : ८ जून २०२६
:::