दिव्य भारत बीएसएम न्यूज : सोमवार , दिनांक 12 ऑक्टोबर 2026

नवमतदार नोंदणी अभियान त्र्यंबकेश्वर महाविद्यालयात उत्साहात संपन्न

१८ वर्षे पूर्ण केलेल्या पात्र 95 विद्यार्थ्यांचे नमुना अर्ज क्रमांक ६ भरून घेतले; मतदानाच्या हक्काविषयी जनजागृती

त्र्यंबकेश्वर (प्रतिनिधी) : युवकांचा निवडणूक प्रक्रियेतील सहभाग वाढविणे आणि लोकशाही मूल्यांविषयी जागरूकता निर्माण करण्याच्या उद्देशाने मविप्र समाजाच्या कला, वाणिज्य व विज्ञान महाविद्यालय, त्र्यंबकेश्वर येथे राष्ट्रीय मतदार नोंदणी अभियान २०२६–२७ अंतर्गत नवमतदार नोंदणी अभियान उत्साहात राबविण्यात आले. महाविद्यालयातील राज्यशास्त्र विभाग आणि तहसील कार्यालय यांच्या संयुक्त विद्यमाने आयोजित या उपक्रमाला विद्यार्थ्यांचा उत्स्फूर्त प्रतिसाद मिळाला. यावेळी वयाची १८ वर्षे पूर्ण केलेल्या पात्र विद्यार्थ्यांचे नवीन मतदार नोंदणीसाठी नमुना अर्ज क्रमांक ६ भरून घेण्यात आले. नव मतदार नोंदणी अभियानाच्या उद्घाटनप्रसंगी त्र्यंबकेश्वरचे नायब तहसीलदार नितीन मेधने यांनी विद्यार्थ्यांना मार्गदर्शन केले. मतदान हा केवळ नागरिकांचा अधिकार नसून लोकशाही व्यवस्थेत सक्रिय सहभाग नोंदविण्याचे महत्त्वपूर्ण माध्यम आहे. प्रत्येक पात्र नागरिकाने मतदार यादीत आपले नाव नोंदवून निवडणूक प्रक्रियेत सहभागी व्हावे. युवकांचा जागरूक सहभाग लोकशाही अधिक सक्षम करण्यासाठी आवश्यक असल्याचे त्यांनी सांगितले.

कार्यक्रमाचे प्रास्ताविक करताना राज्यशास्त्र विभागप्रमुख प्रो. (डॉ.) भागवत महाले यांनी अभियानाची उद्दिष्टे स्पष्ट केली. महाविद्यालयीन विद्यार्थ्यांना भारतीय संविधान, लोकशाही व्यवस्था आणि निवडणूक प्रक्रियेची माहिती प्रत्यक्ष कृतीतून मिळणे आवश्यक आहे. पात्र विद्यार्थ्यांनी मतदार नोंदणी करून आपल्या नागरिकत्वाच्या जबाबदारीची जाणीव ठेवावी. अशा उपक्रमांमुळे विद्यार्थ्यांमध्ये मतदानाचे महत्त्व आणि लोकशाही मूल्यांविषयी जागरूकता निर्माण होते, असे त्यांनी नमूद केले.
कार्यक्रमाच्या अध्यक्षस्थानावरून बोलताना प्राचार्य डॉ. सोमनाथ घुले यांनी मतदार नोंदणीचे महत्त्व अधोरेखित केले. वयाची १८ वर्षे पूर्ण केलेल्या पात्र नागरिकांनी नियमानुसार मतदार नोंदणीची प्रक्रिया पूर्ण करावी आणि मतदार यादीत आपले नाव समाविष्ट झाल्याची खात्री करावी. विद्यार्थ्यांनी आपल्या कुटुंबीयांनाही मतदार नोंदणीबाबत जागरूक करावे, असे आवाहन त्यांनी केले.
कला, वाणिज्य व विज्ञान शाखांतील विद्यार्थ्यांचा सहभाग या अभियानात प्रथम वर्ष कला (FYBA), वाणिज्य (FYBCOM) आणि विज्ञान (FYBSc) शाखांतील 95 विद्यार्थ्यांनी सहभाग घेतला. पात्र विद्यार्थ्यांना नमुना अर्ज क्रमांक ६ भरण्याबाबत मार्गदर्शन करण्यात आले. तसेच मतदार नोंदणीची प्रक्रिया, मतदानाचा अधिकार आणि जबाबदार नागरिकत्व यांविषयी माहिती देण्यात आली. संबंधित मतदान केंद्रस्तरीय अधिकारी (BLO) यांच्या उपस्थितीमुळे या उपक्रमाला प्रशासकीय सहकार्य लाभले.

कार्यक्रमाला नायब तहसीलदार नितीन मेधने, प्राचार्य डॉ. सोमनाथ घुले, प्रा. डॉ. विठ्ठल सोनवणे, प्रो. (डॉ.) भागवत महाले, प्रा. मनोज मगर, प्रा. सुजित हंडोरे यांच्यासह महाविद्यालयातील प्राध्यापक आणि संबंधित मतदान केंद्रस्तरीय अधिकारी उपस्थित होते.
कार्यक्रमाचे सूत्रसंचालन प्रो. (डॉ.) भागवत महाले यांनी केले, तर प्रा. मनोज मगर यांनी आभार मानले.
राष्ट्रीय मतदार नोंदणी अभियानाच्या माध्यमातून युवकांमध्ये लोकशाही मूल्ये, संविधानिक जाणीव आणि नागरिकत्वाची जबाबदारी दृढ करण्याचा प्रयत्न करण्यात आला. “मतदार नोंदणी करा, मतदानाचा हक्क जाणून घ्या आणि लोकशाहीच्या बळकटीकरणासाठी सक्रिय सहभाग घ्या,” हा संदेश या अभियानातून देण्यात आला.

दिव्य भारत बीएसएम न्यूज : सोमवार , दिनांक 12 ऑक्टोबर 2026