दिव्य भारत बीएसएम न्यूज !दिनांक :04-11-2025

अंतापुर,(ता. बागलाण) | प्रतिनिधी: अरुणकुमार भामरे):-
जगप्रसिद्ध जैन तीर्थक्षेत्र श्री १००८ सतीशय चिंतामणी पार्श्वनाथ भगवान मंदिर, मांगीतुंगी येथे वार्षिक यात्रा महोत्सवास सोमवारी (ता. 3 नोव्हेंबर) उत्साहात प्रारंभ झाला. पहाटे पाच वाजता हजारो भाविकांनी पर्वतावरील दिगंबर जैन प्रतिमांचे व मंदिराचे दर्शन घेत अभिषेक पूजन करून या धार्मिक पर्वाची सुरुवात केली. मांगीतुंगी पर्वतावर या काळात अध्यात्म, श्रद्धा आणि पर्यावरण या त्रिसूत्रीचा संगम दिसून येत आहे. देशभरातून आलेल्या भाविकांच्या उपस्थितीत तीर्थक्षेत्र परिसर भक्तिमय झाला आहे.

🔹 भाविकांच्या उपस्थितीत मंगल अभिषेक पूजन :

पहाटेच्या शुभवेळी पर्वतावर असलेल्या दिगंबर जैन प्रतिमांवर अभिषेकाचा कार्यक्रम पार पडला. भाविकांनी पारंपरिक पोशाखात ‘जय जिनेंद्र’च्या घोषात पूजन अर्पण केले. पर्वत पायथ्याशी असलेल्या मूलनायक चिंतामणी पार्श्वनाथ भगवानाच्या मंदिरात सकाळी आठ वाजता अष्टद्रव्य पूजन, साहित्य अभिषेक व सामूहिक आरती करण्यात आली. या सोहळ्यात महिलांपासून तरुणांपर्यंत सर्व वयोगटातील भाविकांनी सहभाग नोंदवला.

🔹 साधुसंतांचे मंगल प्रवचन:

धार्मिक उत्सवाच्या पहिल्या दिवशी देशभरातील ख्यातनाम जैन साधुसंतांच्या उपस्थितीत प्रवचनमाला पार पडली.
यात मुनिश्री १०८ महिमासागरजी महाराज, मुनिश्री १०८ दिव्यसेनजी महाराज, मुनिश्री १०८ परमसागरजी महाराज, १०५ कीर्तिश्री माताजी, सुनंदामती माताजी, सुग्रीवमती माताजी, सुभद्रामती माताजी, मोक्षश्री माताजी, क्षुल्लक नमनसागर महाराज, क्षुल्लिका चारित्रश्री माताजी आणि क्षुल्लिका सम्मेदश्री माताजी यांची मंगल प्रवचने संपन्न झाली. दुपारी दोन वाजता कल्याण मंदिर महामंडळ पूजा विधान आयोजित करण्यात आले. या वेळी चातुर्मासासाठी आलेल्या अकरा साधुसंतांची पादपूजा करून त्यांना नवीन पिछी, कमंडलू आणि शास्त्र भेट देण्यात आले. या विधीने संपूर्ण परिसर भक्तिभावाने न्हाऊन निघाला.

सायंकाळी शास्त्र प्रवचन व मंगल आरती:

सायंकाळी सात वाजता मंदिरात मंगल आरती पार पडली. त्यानंतर बालब्रह्मचारी साधनादीदी व पंडित शैलेशभाई जैन यांच्या मार्गदर्शनाखाली शास्त्र प्रवचन झाले. या प्रवचनांमधून साधनादीदी यांनी “स्वच्छता, संयम आणि साधना” या त्रिसूत्री जीवनमूल्यांवर प्रेरणादायी विचार मांडले. भाविकांनी टाळ्यांच्या गजरात प्रवचनाचा लाभ घेतला.
🔹 भव्य रथमिरवणुकीची जय्यत तयारी: ट्रस्ट कमिटीच्या माहितीनुसार, मंगळवार (ता. ५ नोव्हेंबर) रोजी दुपारी भगवान महावीर यांच्या प्रतिमेची रथमिरवणूक पर्वत पायथ्यापासून पांडूकशिला पर्यंत वाजत-गाजत काढण्यात येणार आहे. या मिरवणुकीत ढोल-ताशा पथक, पारंपरिक पोशाखातील भाविक, सजवलेले रथ आणि पुष्पवर्षावाचे कार्यक्रम होणार आहेत. भक्तिभावाने नटलेले हे दृश्य यात्रेचा मुख्य आकर्षण ठरणार आहे.

यात्रा व्यवस्थापनात ट्रस्ट कमिटीचा सक्रिय सहभाग:

यात्रेची सुरळीत आणि यशस्वी अंमलबजावणी व्हावी यासाठी ट्रस्ट कमिटीचे अध्यक्ष सुमेरकुमार काले, उपाध्यक्ष महेंद्र जैन, महामंत्री डॉ. प्रा. उपेंद्र लाड, कोषाध्यक्ष मोहनभाई जैन, सहमंत्री वर्धमान पांडे, न्यायमूर्ती कैलाशजी चांदीवाल, तसेच प्रविण पहाडे, प्रमोद अजमेरा, किशोर शाह, रमेश गंगवाल, सतीशभाई, राजू बडजाते, प्रदीप ठोले, जितू जैन (व्यवस्थापक), महावीर पांडे आणि किरण जैन यांच्यासह सर्व कर्मचारी व स्वयंसेवक मोठ्या उत्साहाने परिश्रम घेत आहेत.

🔹 यात्रेचा कार्यकाळ वाढविण्याचा निर्णय:

यंदाच्या यात्रेचा कार्यकाळ ता. ९ नोव्हेंबर पर्यंत वाढविण्यात आला असल्याची माहिती यात्रा कमिटीचे अध्यक्ष दोधू ठाकरे यांनी दिली. त्यांनी सांगितले की, “दरवर्षी वाढती भाविकांची गर्दी लक्षात घेऊन आणि लांबवरून येणाऱ्या दुकानदार, व्यावसायिक व हॉटेलधारकांना पुरेसा व्यवसाय करण्याची संधी मिळावी, तसेच भाविकांना यात्रेचा आनंद घेता यावा, यासाठी हा निर्णय घेण्यात आला आहे.”

यात्रा काळात स्वच्छ पिण्याचे पाणी, सुरळीत वीजपुरवठा, आरोग्य व परिवहन विभागाकडून दळणवळण सुविधा, प्लास्टिकमुक्त परिसर, स्वच्छता राखणे आणि पर्यावरण रक्षण या सर्व बाबींसाठी विशेष नियोजन करण्यात आले आहे. तीर्थक्षेत्र, पर्वत परिसर व धार्मिक वास्तूंना कोणतीही हानी पोहोचणार नाही याची दक्षता घेण्यात येत आहे.

ग्रामस्थ व समिती सदस्यांचा सक्रिय सहभाग:

या नियोजनासाठी उपाध्यक्ष अभिमन पवार, उखा कुवर, रवींद्र कुवर, बाळू पवार, पोपट चौधरी, अशोक माळी, बापू कुंवर, रामा देशमुख, राजाराम चौरे, अभिमन पवार, एकनाथ पवार, काळू चौरे, विनोद सोनवणे तसेच भिलवाड यात्रा कमिटीचे सर्व ग्रामस्थ अखंड परिश्रम घेत आहेत. त्यांच्या सामूहिक प्रयत्नांमुळे यात्रेचे सर्व कार्यक्रम यशस्वीरीत्या पार पडत आहेत.

🔹 श्रद्धा, भक्ती आणि पर्यावरणाचा संगम :

मांगीतुंगी यात्रा महोत्सव हा केवळ धार्मिक नव्हे, तर सामाजिक आणि पर्यावरणीय जागरुकतेचा उत्सव बनला आहे. “स्वच्छ यात्रा – हरीत यात्रा” या संकल्पनेतून भाविकांना प्लास्टिकमुक्त आणि स्वच्छ परिसरात अध्यात्मिक अनुभव देण्याचा प्रयत्न केला जात आहे. मांगीतुंगी श्री १००८ सतीशय चिंतामणी पार्श्वनाथ भगवान मंदिरात अभिषेक पूजन करताना भाविक

अंतापुर प्रतिनिधी : अरुणकुमार भामरे
मुख्य संपादक डॉक्टर भागवत महाले

दिव्य भारत बीएसएम न्यूज |