जि. प. प्राथमिक शिक्षक कै. रघुनाथ पांडू चौधरी यांचे हृदयविकाराच्या तीव्र झटक्याने दुःखद निधन,शिक्षण क्षेत्रात हळहळ व्यक्त

सुरगाणा, (नाशिक) | प्रतिनिधी : प्रा. डॉ. भागवत महाले ):-

सुरगाणा तालुक्यातील शिक्षण क्षेत्रासाठी अत्यंत दुःखद अशी बातमी समोर आली आहे. जिल्हा परिषद शाळा हट्टी, ता. सुरगाणा (नाशिक) येथे प्राथमिक शिक्षक म्हणून कार्यरत असलेले कै. रघुनाथ पांडू चौधरी (वय ४९ वर्षे) यांचे दि. २७ डिसेंबर २०२५ रोजी सायंकाळी ५ वाजता हृदयविकाराच्या तीव्र झटक्याने अचानक दुःखद निधन झाले. त्यांच्या अकाली जाण्याने कुटुंबीयांसह शिक्षण क्षेत्रात हळहळ व्यक्त केली जात आहे.
कै. रघुनाथ चौधरी हे मूळचे झुंडीपाडा, ता. सुरगाणा (नाशिक) येथील रहिवासी होते. अत्यंत शांत, मनमिळावू स्वभाव, कर्तव्यनिष्ठा आणि विद्यार्थ्यांप्रती असलेली आपुलकी यासाठी ते ओळखले जात. शिक्षक म्हणून त्यांनी केवळ अध्यापनच नव्हे, तर विद्यार्थ्यांच्या सर्वांगीण विकासासाठी सातत्याने प्रयत्न केले. शालेय उपक्रम, सांस्कृतिक कार्यक्रम, शिस्त आणि गुणवत्तावाढ याबाबत ते नेहमीच आग्रही असत.
त्यांच्या अंत्यविधी दि. २८ डिसेंबर २०२५ रोजी दुपारी १.२५ वाजता त्यांच्या मूळगावी झुंडीपाडा, ता. सुरगाणा (नाशिक) येथे अत्यंत शोकाकुल वातावरणात पार पडले. या वेळी सुरगाणा व दिंडोरी तालुक्यातील बहुसंख्य शिक्षक बांधव, नातेवाईक, ग्रामस्थ आणि परिचित मोठ्या संख्येने उपस्थित होते. सर्वांनी भावपूर्ण श्रद्धांजली अर्पण करून त्यांच्या आठवणींना उजाळा दिला. कै. रघुनाथ चौधरी यांच्या पश्चात पत्नी, तीन मुली, वडील, भाऊ व बहीण असा परिवार आहे. कुटुंबासाठी ते आधारस्तंभ होते. त्यांच्या अचानक जाण्याने कुटुंबावर दुःखाचा डोंगर कोसळला असून सर्वत्र हळहळ व्यक्त केली जात आहे. त्यांनी प्राथमिक शिक्षक म्हणून नोकरीची सुरवात जत तालुक्यातील जिल्हा परिषद शाळेतून जिल्हा सांगली येथून केली होती .
शिक्षक बांधवांनी त्यांच्या कार्याचा गौरव करताना श्री. जोपळे यांनी सांगितले की, “ते विद्यार्थ्यांमध्ये शिस्त, संस्कार आणि शिक्षणाची गोडी निर्माण करणारे शिक्षक होते. सहकाऱ्यांशी नेहमी सुसंवाद ठेवून काम करणारा हा शिक्षक आज आपल्यातून निघून गेला, याची जाणीव स्वीकारणे कठीण आहे.”
त्यांचा दशक्रिया विधी मंगळवार, दि. ०६ जानेवारी २०२६ रोजी सकाळी ९.०० वाजता त्यांच्या राहत्या गावी झुंडीपाडा, ता. सुरगाणा (नाशिक) येथे होणार आहे, अशी माहिती कुटुंबीयांनी दिली आहे.
कै. रघुनाथ पांडू चौधरी यांच्या अल्पशा वयात झालेल्या निधनाने शिक्षण क्षेत्राने एक संवेदनशील, कर्तव्यदक्ष आणि आदर्श शिक्षक गमावला आहे. त्यांच्या स्मृती सदैव शिक्षक बांधव, विद्यार्थी व ग्रामस्थांच्या मनात जिवंत राहतील.
💐 भावपूर्ण श्रद्धांजली 💐