मुल्हेर किल्ल्यावर महाशिवरात्र उत्साहात संपन्न

हजारो भाविकांचा सहभाग, महारुद्र अभिषेक, जागरण, कुस्तीचा आखाडा आणि पर्यावरण संवर्धनाचा संदेश

दिव्य भारत बीएसएम न्यूज : सोमवार दिनांक : 16 फेब्रुवारी 2026

अंतापूर,(ता. बागलाण) (प्रतिनिधी :अरुणकुमार भामरे ):-
बागलाण तालुक्यातील ऐतिहासिक व धार्मिक महत्त्व लाभलेल्या मुल्हेर किल्ल्यावर यंदाची महाशिवरात्र मोठ्या भक्तिभावात आणि उत्साहात संपन्न झाली. हजारो भाविकांनी भगवान सोमेश्वर महाराजांचे दर्शन घेऊन धार्मिक कार्यक्रमांचा लाभ घेतला. या निमित्ताने भाविकांनी पर्यावरण व तीर्थक्षेत्र संवर्धनाची शपथ घेत सामाजिक संदेशही दिला. मुल्हेर किल्ल्यावर गेल्या अनेक वर्षांपासून वास्तव्यास असलेले दिगंबर आणि आखाड्याचे महंत श्री १०८ संत सुदामादास महाराज यांच्या प्रमुख मार्गदर्शनाखाली संपूर्ण कार्यक्रमाचे आयोजन करण्यात आले होते.

पूजन व धार्मिक विधींनी कार्यक्रमाची सुरुवात:

महाशिवरात्रीनिमित्त किल्ल्यावरील गणपती मंदिर, दुर्गामाता, बजरंगबली, भडंगनाथ महाराजांच्या मूर्ती तसेच गोमाता पूजन करण्यात आले. या पूजनानंतर भक्तिमय वातावरणात कार्यक्रमाला सुरुवात झाली.संत सुदामादास महाराजांनी उपस्थित भाविकांना मार्गदर्शन करत सांगितले की,“महाशिवरात्र हा केवळ उपासनेचा दिवस नसून आत्मशुद्धी, समाजएकता आणि पर्यावरण रक्षणाचा संकल्प करण्याचा पर्व आहे.”

रात्री जागरण व भजनाचा गजर:

रात्री उशिरापर्यंत नाशिक, धुळे आणि गुजरात येथून आलेल्या भाविकांनी भजन-कीर्तनाच्या माध्यमातून जागरण केले.हर हर महादेवच्या जयघोषाने संपूर्ण किल्ला परिसर दुमदुमून गेला.टाळ-मृदंगाच्या गजरात वातावरण पूर्णतः भक्तिरसात न्हाऊन निघाले होते.

पहाटे महारुद्र अभिषेक:

महाशिवरात्रीच्या पावन दिवशी पहाटे भाविकांनी सोमेश्वर मंदिरात महारुद्र अभिषेक केला.दूध, दही, मध, तूप, बेलपत्र, फुले अर्पण करून भाविकांनी भगवान सोमेश्वर महाराजांची मनोभावे पूजा केली.या वेळी उपस्थित भाविकांनी आपल्या कुटुंबाच्या सुख-समृद्धीसाठी प्रार्थना केली.

फराळ व प्रसादाचे वाटप:

संत सुदामादास महाराज व भक्त परिवाराच्या वतीने विशेष फराळ व प्रसाद तयार करण्यात आला.हा प्रसाद उपस्थित हजारो भाविकांना वाटप करण्यात आला.भक्तांसाठी हा प्रसाद केवळ अन्न नसून, संतांच्या कृपेचा प्रसाद मानला जातो.

कुस्तीचा आखाडा – परंपरेचे जतन:

महाशिवरात्रीनिमित्त दुपारी कुस्तीचा भव्य आखाडा भरवण्यात आला.महंत सुदामादास महाराज यांच्या हस्ते नारळ अर्पण करून कुस्तीचा शुभारंभ करण्यात आला.यावेळी असंख्य पैलवानांनी कुस्तीच्या मैदानात हजेरी लावली.विजेत्यांना रोख रक्कम, संसार उपयोगी वस्तू, नारळखाऊ तसेच इतर देणग्या देऊन गौरवण्यात आले.हा आखाडा धार्मिकतेसोबतच महाराष्ट्राच्या परंपरेचा अभिमान जपणारा ठरला.

हजारो भाविकांचा सहभाग:

या सोहळ्यास मुल्हेर, मुंगसे, मुंगसेपाडा, नरकोळ, जाखोड, हरणबारी, गोळवाड, केरसाने, ताहाराबाद, जायखेडा, मुंजवाड, सटाणा, पाटणे (ता. मालेगाव) तसेच गुजरात येथून भाविक मोठ्या संख्येने उपस्थित होते.दोन दिवस चाललेल्या या कार्यक्रमामुळे मुल्हेर परिसरात भक्तिभावाचे वातावरण निर्माण झाले होते.

तीर्थक्षेत्र विकासाची गरज:

मुल्हेर किल्ल्यावर भगवान सोमेश्वर महाराजांचे प्राचीन जागृत तीर्थस्थान असून येथे हजारो वर्षांपूर्वीची ऐतिहासिक मंदिरे, प्राचीन वास्तू, पाण्याची टाके, नैसर्गिक पर्यावरण आणि विविध पशुपक्षी पाहायला मिळतात.परंतु किल्ल्यावर जाण्यासाठी सुलभ रस्ता नसल्याने वयोवृद्ध भाविकांना मोठ्या अडचणींचा सामना करावा लागतो.महंत संत सुदामादास महाराजांनी संबंधित शासनाकडे मागणी केली की,“जर या तीर्थक्षेत्राचा योग्य विकास झाला तर पर्यटन वाढेल आणि सुशिक्षित बेरोजगारांना रोजगाराच्या संधी उपलब्ध होतील.”

भाविकांचा निरोप:

दुसऱ्या दिवशी दुपारी भाविकांनी उपवास सोडून जड अंतःकरणाने भगवान सोमेश्वर महाराजांचे दर्शन घेत किल्ल्याचा निरोप घेतला.महाशिवरात्रीचा हा उत्सव भक्ती, परंपरा, कुस्ती संस्कृती आणि पर्यावरण संवर्धनाचा संदेश देणारा ठरला.

📸 फोटो:मुल्हेर किल्ल्यावर महाशिवरात्रीनिमित्त कुस्ती आखाड्याच्या शुभारंभ प्रसंगी महंत श्री १०८ संत सुदामादास महाराज व उपस्थित भाविक.

✍️ दिव्य भारत बीएसएम न्यूज
प्रतिनिधी : (बागलाण) अरुणकुमार भामरे
मुख्य संपादक : डॉ. भागवत महाले

📞 जाहिराती व बातम्यांसाठी संपर्क : +91 8208180510
🌐 अधिक माहितीसाठी भेट द्या : www.divyabharatbsmnews.com