मालेगाव–मनमाड रस्त्यावर खैर लाकूड तस्करीचा मोठा पर्दाफाश

८० लाखांचा मुद्देमाल जप्त; मध्यरात्री ग्रामीण पोलीस व वनविभागाची संयुक्त धडक कारवाई

दिव्य भारत बीएसएम न्यूज | सोमवार दिनांक : 16 फेब्रुवारी 2026
अंतापूर (सटाणा ),(प्रतिनिधी : अरुणकुमार भामरे):-

नाशिक जिल्ह्यातील मालेगाव–मनमाड महामार्गावर कौळाणे फाट्याजवळ मध्यरात्री मोठी खळबळजनक घटना घडली असून, ग्रामीण पोलिसांच्या स्थानिक गुन्हे शाखा मालेगाव युनिट व मालेगाव वनपथकाने संयुक्त कारवाई करत खैराच्या मौल्यवान लाकडांची आंतरराज्यीय तस्करी उधळून लावली आहे. या कारवाईत सुमारे ४० लाख रुपये किमतीचा २० टन खैर लाकडांचा साठा तसेच अवजड १२ चाकी ट्रक असा एकूण ८० लाखांचा मुद्देमाल वन विभागाने जप्त केला आहे. ट्रकच्या दोघा चालकांनाही चौकशीसाठी ताब्यात घेण्यात आले आहे.

संशयास्पद ट्रकवर पोलिसांची नजर:

ग्रामीण पोलिसांच्या स्थानिक गुन्हे शाखा मालेगाव युनिटचे पोलीस उपनिरीक्षक दत्ता कोंबिरे यांचे पथक मध्यरात्री गस्तीवर असताना कौळाणे फाट्याजवळील एका वजनकाट्याजवळ संशयास्पद परिस्थितीत १२ चाकी ट्रक (क्रमांक HR 46 F 9652) उभा असल्याचे दिसून आले.ट्रक चालकांच्या बोलण्यात विसंगती आढळून आल्याने पोलिसांचा संशय बळावला. चालकांनी “लाकूड भरले आहे” असे सांगितल्यावर पोलिसांनी सतर्कता दाखवत त्वरित वनविभागाला माहिती दिली.

वन विभागाची तत्काळ कारवाई :

नाशिक पूर्व वन विभागाचे सहाय्यक वनसंरक्षक शिवाजी सहाने यांनी मालेगावचे वनपरिमंडळ अधिकारी प्रकाश सोमवंशी, वनरक्षक रमेश बागुल यांच्याशी संपर्क साधून घटनास्थळी वनपथक रवाना केले. वन अधिकाऱ्यांनी ट्रकची तपासणी केली असता चालकांकडे “सुबाभूळ” वृक्षाचा ना हरकत दाखला दाखवण्यात आला, मात्र प्रत्यक्षात ट्रकमध्ये खैरासारख्या मौल्यवान प्रजातीचे लाकूड भरले असल्याचे स्पष्ट झाले.

परवानगी व हॅमर नसल्याने तस्करी सिद्ध:

वन अधिकाऱ्यांच्या माहितीनुसार, अधिकृत वाहतुकीसाठी लाकडांवर वनविभागाचा पासिंग हॅमर असणे आवश्यक असते.मात्र, या ट्रकमधील लाकडांवर कोणताही वनखात्याचा हॅमर नव्हता, तसेच चालकांकडे वाहतुकीचा अधिकृत परवाना किंवा पासही आढळून आला नाही.यामुळे ही वाहतूक पूर्णतः बेकायदेशीर व अनधिकृत तस्करी असल्याचे निष्पन्न झाले.

हरियाणाकडे जाणार होता मौल्यवान माल:

पहाटे सहाय्यक वनसंरक्षक शेखर तनपुरे व वनपरिक्षेत्र अधिकारी गायत्री सोनवणे यांनी चालकांची चौकशी केली असता, हा मौल्यवान खैर माल मालेगाव मार्गे मध्यप्रदेशातून पुढे हरियाणाकडे नेण्यात येणार होता, असे समोर आले.तसेच प्राथमिक तपासात हा साठा मैसूर परिसरातून अवैधरित्या आणण्यात आल्याची माहिती मिळाली आहे.

आंतरराज्यीय रॅकेटचा संशय:

वनविभागाने स्पष्ट केले आहे की, या प्रकरणामागे मोठ्या आंतरराज्यीय तस्करी रॅकेटचा संशय असून,

• लाकडांचा साठा नेमका कुठून आणला?
• कोणाच्या आदेशावर वाहतूक केली जात होती?
• या साखळीत अजून कोण सहभागी आहेत?

याचा तपास सुरू आहे. उपवनसंरक्षक राकेश शेपट यांनी सांगितले की, या प्रकरणात वन अधिनियम अंतर्गत गुन्हा दाखल करण्यात आला आहे.

कारवाईत सहभागी अधिकारी :

या धडक कारवाईदरम्यान

• पोलीस उपनिरीक्षक दत्ता कोंबिरे व सहकारी
• सहाय्यक वनसंरक्षक शेखर तनपुरे
• वनाधिकारी प्रकाश सोमवंशी
• वनरक्षक रमेश बागुल
• डेपोवन संरक्षक रवींद्र गवळी, गोपाळ गवळी
  आदी अधिकारी उपस्थित होते.

कौळाणे फाट्याजवळ झालेली ही कारवाई नाशिक जिल्ह्यातील वनसंपदा संरक्षणासाठी मोठी यशस्वी पावले ठरली आहे. मौल्यवान खैर लाकूड तस्करीवर आळा घालण्यासाठी ग्रामीण पोलीस व वनविभागाचे संयुक्त प्रयत्न कौतुकास्पद आहेत.या प्रकरणातून मोठे रॅकेट उघडकीस येण्याची शक्यता असून पुढील तपासाकडे संपूर्ण जिल्ह्याचे लक्ष लागले आहे.

📸 फोटो : कौळाणे (ता. मालेगाव) येथे ८० लाखांचा खैर लाकूड साठा जप्त करण्यात आला. याप्रसंगी सहाय्यक वनसंरक्षक शेखर तनपुरे, वनाधिकारी, कर्मचारी व संशयित ट्रक चालक.

दिव्य भारत बीएसएम न्यूज | सोमवार दिनांक : 16 फेब्रुवारी 2026
अंतापूर (सटाणा ),(प्रतिनिधी : अरुणकुमार भामरे):-