दिव्य भारत बीएसएम न्यूज : सोमवार, दिनांक : 29 जून 2026

उंबरदे (प) येथे जनगणना मोहिमेसाठी अधिकाऱ्यांची पायपीट

इंधन टंचाईतही कर्तव्याला प्राधान्य; उन्हाची पर्वा न करता घराघरांत पोहोचले अधिकारी

पळसण (सुरगाणा ) : प्रतिनिधी :हिरामण चौधरी ):- उंबरदे (प) : शासनाच्या महत्त्वाकांक्षी जनगणना मोहिमेला ग्रामीण भागात वेग आला असून उंबरदे (प) येथे जनगणना करण्यासाठी अधिकारी भास्कर चौधरी तसेच सुनील गवळी यांनी प्रत्यक्ष गावात जाऊन नागरिकांची माहिती संकलित केली. प्रखर उन्हाळा, वाढते तापमान आणि इंधन टंचाई यांसारख्या अडचणींना न जुमानता या अधिकाऱ्यांनी पायपीट करत गावातील विविध वाड्या-वस्त्यांपर्यंत पोहोचून आपले कर्तव्य बजावले.गेल्या काही दिवसांपासून परिसरात इंधन टंचाईची समस्या निर्माण झाल्याने वाहनांचा वापर मर्यादित झाला आहे. अशा परिस्थितीत अनेक ठिकाणी शासकीय कामांवर परिणाम होत असताना उंबरदे (प) येथे मात्र जनगणनेचे काम खंडित होऊ दिले नाही. अधिकारी भास्कर चौधरी आणि सुनील गवळी यांनी गावातील दुर्गम भागात पायी फिरून प्रत्येक कुटुंबाची माहिती नोंदवली. त्यांच्या या कामामुळे गावकऱ्यांमध्ये समाधान आणि कौतुकाची भावना व्यक्त होत आहे.

जनगणना प्रक्रियेदरम्यान कुटुंबातील सदस्यांची संख्या, शिक्षण, व्यवसाय, राहणीमान, शासकीय योजनांचा लाभ, सामाजिक व आर्थिक माहिती आदी तपशील संकलित करण्यात आले. ग्रामीण भागातील अचूक माहिती शासनाच्या विविध योजना आणि विकासकामांसाठी अत्यंत महत्त्वाची मानली जात असल्याने अधिकारीही काळजीपूर्वक माहिती गोळा करत असल्याचे दिसून आले.दुपारच्या कडक उन्हातही अधिकारी गावातील रस्ते, पायवाटा आणि डोंगराळ भागातून चालत नागरिकांपर्यंत पोहोचले. “शासनाचे काम आणि नागरिकांची सेवा हेच आमचे कर्तव्य,” अशी भावना अधिकाऱ्यांनी व्यक्त केल्याचे ग्रामस्थांनी सांगितले. अनेक ग्रामस्थांनी अधिकाऱ्यांना पिण्याचे पाणी देत सहकार्य केले.

गावातील नागरिकांनीही जनगणना मोहिमेला उत्स्फूर्त प्रतिसाद देत आवश्यक माहिती उपलब्ध करून दिली. प्रशासन आणि ग्रामस्थ यांच्या सहकार्यामुळे उंबरदे (प) येथे जनगणना प्रक्रिया सुरळीत पार पडत असल्याचे चित्र दिसून आले.इंधन टंचाईसारख्या अडचणी असूनही अधिकारी पायपीट करत गावात पोहोचल्याने “कर्तव्यनिष्ठ अधिकारी” म्हणून भास्कर चौधरी आणि सुनील गवळी यांचे परिसरात विशेष कौतुक होत आहे. शासनाच्या कामासाठी अधिकाऱ्यांनी दाखविलेली जिद्द आणि समर्पण हे इतरांसाठी प्रेरणादायी ठरत आहे. फोटो. १)उंबरदे (प) येथे जनगणना मोहीमेसाठी अधिकारी भास्कर चौधरी व सुनील गवळी पायपीट करत येताना.२) उंबरदे (प) गनजनणा करताना अधिकारी भास्कर चौधरी सोबत सुनील गवळी..

दिव्य भारत बीएसएम न्यूज : सोमवार, दिनांक : 29 जून 2026