दिव्य भारत बीएसएम न्यूज : बुधवार : दिनांक :08 जुलै 2026

येडशी ग्रामीण दूरक्षेत्रात आठ पोलीसांची नियुक्ती करा; गजानन नलावडे यांचे पोलीस अधीक्षकांना निवेदन

येडशी | प्रतिनिधी (सुभान शेख) | दि. ७ जुलै

धाराशिव तालुक्यातील वाढती लोकसंख्या, राष्ट्रीय महामार्गावरील वाढती वाहतूक, चोरी व कायदा-सुव्यवस्थेच्या घटना तसेच नागरिकांना तक्रार नोंदविण्यासाठी होणारी गैरसोय लक्षात घेऊन येडशी येथील ग्रामीण दूरक्षेत्रात किमान आठ पोलीस कर्मचाऱ्यांची तातडीने नियुक्ती करण्यात यावी, अशी मागणी सामाजिक कार्यकर्ते गजानन नलावडे यांनी धाराशिवच्या पोलीस अधीक्षक सौ. रितु खोकर यांच्याकडे निवेदनाद्वारे केली आहे.

सोमवार, दि. ६ जुलै २०२६ रोजी सादर करण्यात आलेल्या या निवेदनात येडशी परिसरातील वाढत्या सुरक्षाविषयक प्रश्नांकडे पोलीस प्रशासनाचे लक्ष वेधण्यात आले आहे. येडशी हे धाराशिव ग्रामीण पोलीस ठाण्याच्या कार्यक्षेत्रातील महत्त्वाचे ग्रामीण दूरक्षेत्र असून या परिसरात पोलीस बंदोबस्ताची कमतरता असल्यामुळे नागरिकांना विविध अडचणींचा सामना करावा लागत असल्याचे निवेदनात नमूद करण्यात आले आहे.

येडशी गावाची लोकसंख्या सुमारे २५ ते ३० हजारांच्या घरात असून हे गाव तालुक्यातील प्रमुख व्यापारी, सामाजिक आणि वाहतूक केंद्र म्हणून ओळखले जाते. ग्रामीण दूरक्षेत्र येडशीच्या कार्यक्षेत्रात येडशी, आळणी, कुमाळवाडी, गडदेवदरी, खताळवाडी आणि जहागीरदारवाडी अशी एकूण सहा गावे येतात. या सर्व गावांतील नागरिकांना पोलीस सेवांसाठी येडशीवर अवलंबून राहावे लागते. मात्र येथे कायमस्वरूपी पुरेशा पोलीस कर्मचाऱ्यांची उपलब्धता नसल्याने नागरिकांच्या अडचणी वाढत असल्याचा मुद्दा निवेदनात मांडण्यात आला आहे.येडशी हे गाव चार प्रमुख रस्त्यांच्या संगमावर वसलेले असल्यामुळे या ठिकाणाहून मोठ्या प्रमाणात वाहतूक होत असते. सोलापूर–संभाजीनगर मार्ग तसेच लातूर–पुणे राष्ट्रीय महामार्ग या परिसरातून जात असल्याने दिवसभर हजारो वाहनांची ये-जा सुरू असते. त्यामुळे वाहतूक नियंत्रणाबरोबरच कायदा व सुव्यवस्था राखण्याचे मोठे आव्हान पोलीस प्रशासनासमोर असते. वाढत्या वर्दळीमुळे चोरी, भांडणे, वाहतूक नियमांचे उल्लंघन तसेच इतर गुन्हेगारी घटनांमध्ये वाढ होत असल्याचेही निवेदनात नमूद करण्यात आले आहे.गेल्या काही वर्षांत येडशी गावाचा झपाट्याने विस्तार झाला असून नवीन वसाहती, व्यापारी आस्थापने आणि रहिवासी परिसर वाढले आहेत. वाढत्या नागरीकरणामुळे मालमत्तेवरील गुन्हे, घरफोड्या, चोरी तसेच किरकोळ वादांच्या घटनांमध्ये वाढ होत असल्याचे नागरिकांचे म्हणणे आहे. अशा परिस्थितीत पोलीस उपस्थिती वाढविणे आणि नागरिकांना त्वरित मदत उपलब्ध करून देणे आवश्यक असल्याचे नलावडे यांनी अधोरेखित केले आहे.येडशीपासून अवघ्या तीन किलोमीटर अंतरावर असलेले ग्रामदैवत श्री क्षेत्र रामलिंग देवस्थान हे परिसरातील प्रसिद्ध धार्मिक स्थळ आहे. दरवर्षी श्रावण महिन्यात येथे महिनाभर मोठी यात्रा भरते. या यात्रेसाठी जिल्ह्यासह राज्याच्या विविध भागांतून हजारो भाविक येत असतात. यात्रेच्या काळात गर्दी मोठ्या प्रमाणात वाढत असल्याने वाहतूक व्यवस्थापन, सुरक्षेची काळजी, चोरीच्या घटना रोखणे तसेच कायदा-सुव्यवस्था अबाधित राखण्यासाठी अतिरिक्त पोलीस बंदोबस्ताची गरज भासते. मात्र सध्या उपलब्ध मनुष्यबळ अपुरे असल्याने पोलीस यंत्रणेवर अतिरिक्त ताण येत असल्याचा उल्लेख निवेदनात करण्यात आला आहे.

येडशी व परिसरातील नागरिकांना कोणतीही तक्रार नोंदविण्यासाठी धाराशिव ग्रामीण पोलीस ठाण्यात जावे लागते. त्यामुळे वेळ, पैसा आणि श्रम यांचा अतिरिक्त खर्च होत असून अनेक वेळा किरकोळ तक्रारी नोंदविणेही नागरिकांना अवघड जाते. ही समस्या लक्षात घेऊन ग्रामीण दूरक्षेत्र येडशी येथेच तक्रारी स्वीकारण्याची कायमस्वरूपी व्यवस्था करण्यात यावी, अशीही मागणी करण्यात आली आहे.तसेच येडशी ग्रामीण दूरक्षेत्रात किमान आठ पोलीस कर्मचारी नियुक्त करून २४ तास पोलीस सेवा उपलब्ध करून द्यावी. यामुळे परिसरातील गुन्हेगारीवर प्रभावी नियंत्रण मिळविणे, तातडीने घटनास्थळी पोहोचणे, यात्रा व सार्वजनिक कार्यक्रमांमध्ये सुरक्षा पुरविणे तसेच नागरिकांचा पोलीस प्रशासनावरील विश्वास अधिक दृढ होण्यास मदत होईल, असे निवेदनात नमूद करण्यात आले आहे.

पोलीस अधीक्षक सौ. रितु खोकर यांनी या मागणीची सकारात्मक दखल घेऊन येडशी ग्रामीण दूरक्षेत्रातील पोलीस मनुष्यबळ वाढविण्यासाठी आवश्यक निर्णय घ्यावा, अशी अपेक्षा निवेदनाद्वारे व्यक्त करण्यात आली आहे. वाढत्या लोकसंख्येच्या तुलनेत पोलीस यंत्रणा सक्षम करणे ही काळाची गरज असल्याचेही निवेदनात अधोरेखित करण्यात आले आहे.या निवेदनावर दत्तात्रय भीमराव पवार, मदन दिलीप पवार, सुनील नानासाहेब सोलवट, चेतन मधुसूदन कदम, गणेश भालचंद्र पवार, सुरेश अनपट, रामलिंग नकाते, कल्याण इंगळे, बालाजी अनपट, अरविंद वसंत पवार, किरण मोहन देशमुख, शैलेश सुनील तपसे, मनोज गवसाणे, नितीन मोरे, मंगेश देशमुख, अशोक अरुण देशमुख, शरद रनिंग गोरे, सुनील गैबीराज अनपट, बाळासाहेब बाबुराव पवार, सुभान शेख, अंबऋषी तात्या जाधव, प्रवीण दत्तात्रय देशमुख, राहुल पवार, नवनाथ अरविंद शेळके, सुनील भगवान वाघमारे यांच्यासह अनेक ग्रामस्थांच्या स्वाक्षऱ्या आहेत. परिसरातील नागरिकांच्या सुरक्षेच्या दृष्टीने ही मागणी तातडीने मान्य करून आवश्यक पोलीस मनुष्यबळ उपलब्ध करून द्यावे, अशी सर्वांची एकमुखी अपेक्षा आहे.

दिव्य भारत बीएसएम न्यूज : बुधवार : दिनांक :08 जुलै 2026