दिव्य भारत बीएसएम न्यूज | सोमवार,दिनांक : 21 सप्टेंबर 2026

मविप्र सेवकांना १ जानेवारी २०२७ पासून सातवा वेतन आयोग!
१० वर्षांपेक्षा अधिक काळ सेवेत असलेल्या सेवकांना लाभ; उर्वरित सेवकांनाही योग्य वेतनवाढ देण्याचे आश्वासन
१२२९ कोटी ३० लाख रुपयांच्या विक्रमी अंदाजपत्रकास सर्वानुमते मंजुरी; ५,२०९ विद्यार्थ्यांना रोजगार, प्लेसमेंटसह ७,७१२ रोजगारनिर्मिती

दिव्य भारत बीएसएम न्यूज |
नाशिक( प्रतिनिधी : निलेश शेकोकार ):-
मराठा विद्या प्रसारक समाजाच्या ११२ व्या वार्षिक सर्वसाधारण सभेत संस्थेतील १० वर्षांपेक्षा अधिक काळ सेवेत असलेल्या सेवकांसाठी महत्त्वपूर्ण घोषणा करण्यात आली. अशा सेवकांना १ जानेवारी २०२७ पासून सातवा वेतन आयोग लागू करण्यात येणार असल्याची घोषणा मविप्रचे सरचिटणीस ॲड. नितीन ठाकरे यांनी केली. तसेच संस्थेतील उर्वरित सेवकांनाही योग्य वेतनवाढ देण्याचे आश्वासन त्यांनी यावेळी दिले.
मराठा हायस्कूलच्या कैलासवाशी तुकारामजी रौंदळ सभागृहात झालेल्या या वार्षिक सर्वसाधारण सभेच्या अध्यक्षस्थानी मविप्रचे अध्यक्ष डॉ. सुनील ढिकले होते. सभेत संस्थेच्या विविध आर्थिक, शैक्षणिक आणि प्रशासकीय विषयांवर सविस्तर चर्चा करण्यात आली. सन २०२६-२७ साठी संस्थेच्या १२२९ कोटी ३० लाख रुपयांच्या विक्रमी अंदाजपत्रकास सर्वानुमते मंजुरी देण्यात आली.
सभेत संस्थेच्या भविष्यातील विकासाच्या दृष्टीने विविध महत्त्वपूर्ण निर्णयांवर चर्चा झाली. संस्थेच्या शैक्षणिक शाखांचा विस्तार, विद्यार्थ्यांना रोजगाराच्या संधी, पायाभूत सुविधांची उभारणी, सेवकांचे हित तसेच विविध सामाजिक व शैक्षणिक उपक्रम यांचा आढावा घेण्यात आला.
१० वर्षांपेक्षा अधिक सेवाकाळ असलेल्या सेवकांना सातवा वेतन आयोग :
संस्थेच्या सेवकांच्या वेतनविषयक प्रश्नावर बोलताना सरचिटणीस ॲड. नितीन ठाकरे यांनी १० वर्षांपेक्षा अधिक काळ संस्थेत सेवा बजावणाऱ्या सेवकांसाठी सातवा वेतन आयोग लागू करण्याची घोषणा केली. १ जानेवारी २०२७ पासून हा निर्णय लागू होणार असल्याचे त्यांनी स्पष्ट केले. तसेच संस्थेतील उर्वरित सेवकांनाही योग्य वेतनवाढ देण्यात येणार असल्याचे त्यांनी सांगितले.
या घोषणेमुळे दीर्घकाळ संस्थेच्या विविध शाखांमध्ये सेवा बजावणाऱ्या सेवकांना वेतनाच्या दृष्टीने दिलासा मिळण्याची अपेक्षा व्यक्त करण्यात आली. संस्थेच्या विकासात सेवकांचे योगदान महत्त्वाचे असून त्यांच्या हिताचा विचार करून निर्णय घेतला जात असल्याचे यावेळी सांगण्यात आले.
५१४ शैक्षणिक शाखांमध्ये २ लाख १२ हजारांहून अधिक विद्यार्थी :
सरचिटणीस ॲडव्हॅकेट . नितीन ठाकरे यांनी संस्थेचा अहवाल सभेसमोर मांडताना मागील चार वर्षांतील संस्थेच्या कामगिरीवर प्रकाश टाकला. मविप्र समाजाच्या ५१४ शैक्षणिक शाखांमध्ये २,१२,८१६ विद्यार्थी आणि ११,५६५ सेवक कार्यरत असल्याची माहिती अहवालातून देण्यात आली.
संस्थेच्या विविध शैक्षणिक शाखांमध्ये विद्यार्थीसंख्येत वाढ झाली असून शिक्षणाच्या माध्यमातून विद्यार्थ्यांना रोजगाराभिमुख संधी उपलब्ध करून देण्यासाठी विविध उपक्रम राबविण्यात येत असल्याचेही अहवालात नमूद करण्यात आले.
रोजगारनिर्मितीला मोठी चालना :
सन २०२५-२६ मध्ये संस्थेच्या विविध शाखांमार्फत आयोजित करण्यात आलेल्या १४ रोजगार मेळाव्यांमध्ये १३,३६० विद्यार्थ्यांची नोंदणी झाली. त्यापैकी ५,२०९ विद्यार्थ्यांना नोकरी मिळाली, तर प्लेसमेंटसह एकूण ७,७१२ रोजगारनिर्मिती झाल्याची माहिती सभेत देण्यात आली.
विद्यार्थ्यांना केवळ पदवीपर्यंत मर्यादित न ठेवता त्यांच्या कौशल्यविकासावर भर देऊन उद्योग व विविध संस्थांशी समन्वय साधण्याचा प्रयत्न संस्थेच्या माध्यमातून सुरू असल्याचे अहवालातून स्पष्ट झाले. रोजगार मेळावे, कौशल्य प्रशिक्षण आणि विविध संस्थांशी सामंजस्य करार यामुळे विद्यार्थ्यांना रोजगाराच्या नव्या संधी उपलब्ध होत असल्याचेही यावेळी सांगण्यात आले.
इमारत बांधकामासाठी ५१ कोटी ६७ लाखांचा खर्च
संस्थेच्या विविध शैक्षणिक शाखांच्या पायाभूत सुविधांच्या विकासावरही भर देण्यात आला आहे. विविध शाखांच्या इमारत बांधकामासाठी ५१ कोटी ६७ लाख रुपये खर्च करण्यात आल्याची माहिती देण्यात आली.
तसेच मागील चार वर्षांच्या कालावधीत संस्थेने ४७ कोटी ९८ लाख १४ हजार रुपयांची कर्जफेड केल्याचे अहवालात नमूद करण्यात आले. संस्थेच्या आर्थिक व्यवस्थापनाच्या दृष्टीने ही बाब महत्त्वपूर्ण असल्याचे सभेत स्पष्ट करण्यात आले.
विविध शैक्षणिक व सामाजिक उपक्रम :
मविप्र समाजाच्या माध्यमातून विविध शैक्षणिक, सामाजिक, कौशल्यविकास आणि विद्यार्थीहिताचे उपक्रम राबविण्यात येत आहेत. यामध्ये चौथ्या विश्व मराठी संमेलनाचे आयोजन, रेडिओ कर्मवीर ८८.४ MHz कम्युनिटी स्टेशन, मविप्र फिटनेस अकॅडमी, मविप्र माऊंटेनेरिंग क्लब, मराठा उद्योजक मेळावे आणि बॉश टेक्निकल स्किल सेंटर यांचा समावेश आहे.याशिवाय विविध राष्ट्रीय व आंतरराष्ट्रीय संस्थांशी सामंजस्य करार करण्यात आले असून त्यातून विद्यार्थ्यांना शिक्षण, कौशल्यविकास, प्रशिक्षण आणि रोजगाराच्या संधी उपलब्ध करून देण्याचा प्रयत्न करण्यात येत आहे.
फायर ब्रिगेड स्टेशनसाठीची जागा हस्तांतरणाचा विषय प्रलंबित :
सभेत स. नं. ६९० ‘अ’ व ‘ब’ मधील फायर ब्रिगेड स्टेशनसाठी आरक्षित असलेली ८ हजार चौरस मिटर जागा नाशिक महानगरपालिकेकडे हस्तांतरित करण्याच्या विषयावरही चर्चा झाली. मात्र हा विषय कायदेशीर सल्ल्यासाठी प्रलंबित ठेवण्यात आला. कायदेशीर बाबींचा विचार करून पुढील निर्णय घेण्यात येणार असल्याचे सभेत स्पष्ट करण्यात आले.
दुखवटा प्रस्तावाने सभेची सुरुवात :
सभेच्या प्रारंभी संस्थेचे सभापती बाळासाहेब क्षीरसागर यांनी दुखवटा प्रस्ताव मांडला. त्यानंतर सरचिटणीस ॲड . नितीन ठाकरे यांनी संस्थेचा अहवाल सभेसमोर सादर केला. मागील चार वर्षांत संस्थेने केलेल्या शैक्षणिक, आर्थिक, प्रशासकीय आणि सामाजिक कामकाजाचा त्यांनी आढावा घेतला.सभेचे प्रास्ताविकही ॲड . नितीन ठाकरे यांनी केले. शिक्षणाधिकारी डी. डी. जाधव यांनी मागील सभेच्या इतिवृत्ताचे वाचन केले. त्यानंतर विविध विषयांवर चर्चा होऊन संबंधित ठरावांना मंजुरी देण्यात आली.
पदाधिकारी, संचालक व सभासदांची उपस्थिती :
या वार्षिक सर्वसाधारण सभेस मविप्रचे उपाध्यक्ष विश्वासराव मोरे, उपसभापती देवराम मोगल, चिटणीस दिलीप दळवी, संचालक डॉ. प्रसाद सोनवणे, ॲड. संदीप गुळवे, ॲड. लक्ष्मण लांडगे, ॲड. रमेशचंद्र बच्छाव, रमेश पिंगळे, ॲड. सयाजीराव गायकवाड, संचालक शिवाजी गडाख, रवींद्र देवरे, कृष्णाजी भगत, प्रवीण जाधव, नंदकुमार बनकर, विजय पगार, अमित बोरसे, महिला सदस्य शोभा बोरस्ते, शालन सोनवणे, सेवक सदस्य प्रा. सी. डी. शिंदे आणि जगन्नाथ निंबाळकर उपस्थित होते.
तसेच माजी सरचिटणीस निलिमा पवार, माजी अध्यक्ष तुषार शेवाळे, अरविंद कारे, माणिकराव बोरस्ते, माजी आमदार नानासाहेब बोरस्ते, नाना महाले, निवृत्त पोलीस महानिरीक्षक प्रताप दिघावकर, भाऊसाहेब खताळे, पुंडलिक थेटे, नानासाहेब दाते, राजेंद्र मोगल आणि विजय गडाख यांच्यासह जिल्हाभरातील हजारो सभासद व हितचिंतक उपस्थित होते.संस्थेच्या ११२ व्या वार्षिक सर्वसाधारण सभेत मंजूर करण्यात आलेले १२२९ कोटी ३० लाख रुपयांचे अंदाजपत्रक, सेवकांसाठी सातवा वेतन आयोग, शैक्षणिक शाखांचा विस्तार, रोजगारनिर्मिती, पायाभूत सुविधांवरील खर्च आणि विविध शैक्षणिक-सामाजिक उपक्रम यामुळे संस्थेच्या आगामी वाटचालीसंदर्भातील विविध बाबींवर सभेत सविस्तर चर्चा झाली.

दिव्य भारत बीएसएम न्यूज
नाशिक,प्रतिनिधी : निलेश शेकोकार

दिव्य भारत बीएसएम न्यूज | सोमवार,दिनांक : 21 सप्टेंबर 2026