येडशी प्राथमिक आरोग्य केंद्र व खाजगी रुग्णालयात रुग्णांची आर्थिक लूट, रुग्णसेवेची त्रासदायक परिस्थिती
β⇔ दिव्य भारत बीएसएम न्यूज वृत्तसेवा : नाशिक : मंगळवार : दि, 01 ऑक्टोबर 2024
β⇔येडशी(धाराशिव),दि,01(प्रतिनिधी : सुभान शेख):- धाराशिव तालुक्यातील येडशी येथील ग्रामस्थांकडून मिळालेल्या माहितीनुसार, मागील काही वर्षांपासून खाजगी रुग्णालयांमध्ये रुग्णांकडून इंजेक्शनसाठी ७० ते १०० रुपये आकारले जात आहेत. औषधांच्या चिठ्ठीवर फक्त गोळ्या लिहून देण्यासाठी ५० रुपये आकारले जात असल्याची तक्रार आहे.येडशी गावात सुमारे ३०% लोकसंख्या ही कामगार आणि मजुरी करणाऱ्यांची आहे, ज्यांची आर्थिक परिस्थिती अत्यंत कठीण आहे. या परिस्थितीत त्यांना उपचारांसाठी प्राथमिक आरोग्य केंद्रावर अवलंबून राहावे लागते. मात्र, प्राथमिक आरोग्य केंद्रातील औषधांचा आणि सुविधांचा तुटवडा असल्याने रुग्णांना योग्य उपचार मिळत नाहीत.
येडशी गावाची लोकसंख्या सुमारे २५,००० असून, येथील प्राथमिक आरोग्य केंद्रात येडशीसह आजुबाजूच्या खेड्यांतील नागरिक, महिला, वृद्ध आणि लहान मुलांना उपचारांसाठी ये-जा करावी लागते. परंतु, येथे साधी खोकल्याची औषध बाटली सुद्धा वेळेवर उपलब्ध नसते. ग्रामस्थांच्या मते, शासनाने पाठविलेल्या औषधांचा हिशेबच नसतो, आणि अनेकदा औषधांचा तुटवडा जाणवतो.
यामुळे येडशी “प्राथमिक आरोग्य केंद्र रुग्णांसाठी आहे, की स्वतःची सोय बघण्यासाठी?” असा प्रश्न उपस्थित होत आहे. ग्रामस्थांनी आरोग्यमंत्री यांच्याकडे तात्काळ लक्ष देण्याची मागणी केली असून, प्राथमिक आरोग्य केंद्रातील रुग्णांची होणारी हेळसांड थांबवावी, असे आवाहन केले आहे. खाजगी रुग्णालयांमध्ये रुग्णांची आर्थिक लूट होत आहे, तर प्राथमिक आरोग्य केंद्रात रुग्णसेवेचा अभाव जाणवतो, अशी गंभीर स्थिती येडशी गावातील आरोग्य व्यवस्थेत पाहायला मिळत आहे.
β⇔ दिव्य भारत बीएसएम न्यूज : मुख्य संपादक : डॉ. भागवत महाले : मो. 8208180510
ताज्या बातम्या व घडामोडी नियमित बघत राहा. “दिव्य भारत बीएसएम न्यूज” )
