🔊 Listen to this

“बाल लैंगिक शोषणाला प्रतिबंध” प्रशिक्षण मोहिम सुरगाणा येथे संपन्न ! तालुक्यातील १२२५ शिक्षकांचा मोहिमेत सहभाग

β⇔दिव्य भारत बीएसएम न्यूज वृत्तसेवा : नाशिक : सोमवार  : दि.14  एप्रिल  2025

🅱️⇔सुरगाणा(नाशिक),,दि.14 (प्रतिनिधी–रतन चौधरी):- नाशिक जिल्हा परिषद व अर्पण संस्था, मुंबई यांच्या संयुक्त विद्यमाने जिल्हा परिषद शाळेतील प्राथमिक शिक्षक, मुख्याध्यापकांसह शिक्षकांना‘बाल लैंगिक शोषणास प्रतिबंध करणाऱ्या वैयक्तिक सुरक्षा शिक्षण कार्यक्रमाचे आयोजन करण्यात आले होते. ७ ते १२ एप्रिल दरम्यान झालेल्या प्रशिक्षण मोहिम १२२५ कार्यरत शिक्षकांना प्रशिक्षित करण्यात आले.या समाविष्ट शाळांमध्ये वैयक्तिक सुरक्षा शिक्षण लागू झाले आहे.
पालक व प्रौढ भागधारकांना बाल लैंगिक शोषण व वैयक्तिक सुरक्षा शिक्षण तर विद्यार्थ्यांना वैद्यकीय सुरक्षा शिक्षण या विषयावर मार्गदर्शन करण्यात येणार आहे. मुलांसाठी सुरक्षित वातावरण निर्माण होण्यासाठी या मोहिमेची मदत मिळेल.
            अर्पण ही संस्था,मुंबईसह जागतिक स्तरावर मान्यताप्राप्त, भारतातील बाल लैंगिक शोषणाच्या निर्मूलनासाठी काम करणारी पुरस्कारप्राप्त अशासकीय संस्था(एन.जी.ओ) आहे. अर्पण ही भारतातील सर्वात मोठी अशासकीय संस्था आहे जी लहान मुलांसहित प्रौढांसाठी सुद्धा बाल लैंगिक शोषण प्रतिबंध आणि हस्तक्षेप प्रशिक्षण सेवा प्रदान करते. २००७ पासून अर्पणने २० लाख मुलां व प्रौढांना प्रभावित केले आहे.मोहिमेच्या या चरणामध्ये जिल्ह्यातील नाशिक,सुरगणा या तालुक्यातील शिक्षकांसाठी हा उपक्रम आयोजित करण्यात येत आहे.या प्रशिक्षणात
बाल लैंगिक शोषण या मुद्द्याची ओळख, बाल लैंगिक शोषण म्हणजे काय?,ऑनलाईन लैंगिक शोषण, बाल लैंगिक शोषणाची लक्षणे, मूल आणि मुलांचे अधिकार, बाल शोषण आणि बाल लैंगिक शोषणाचे प्रकार,आकडेवारी, बाल लैंगिक शोषणाचा अल्पकालीन आणि दीर्घकालीन प्रभाव,पोक्सो कायदा आणि तरतूदी या बाबत सविस्तर चर्चा या सत्रात होणार आहे.
लैंगिक शोषण टाळण्यासाठी प्रतिबंधात्मक कार्यक्रम “वैयक्तिक सुरक्षा शिक्षण”:
          ६ ते १६ वयोगटातील मुलांसाठी, गोष्टींवर आधारित वैयक्तिक सुरक्षा शिक्षण आणि ऑनलाईन ई-लर्न कोर्सचा परिचय व प्रतिबंधात्मक धड़े देऊन तसेच जीवन कौशल्यवर आधारित माहिती देऊन मुलांचे सक्षमीकरण कसे करावे याबाबत प्रस्तुतिकरण करण्यात येईल.
मुलांचे प्रकटीकरण कसे हाताळावे? प्रकटनाचे प्रकार आणि बाल लैंगिक शोषणाची केस हाताळताना शिक्षकांनी कोणत्या कौशल्याचा वापर करावा याबाबत अद्ययावत माहितीचे प्रस्तुतिकरण केले जाईल.
या प्रशिक्षणासाठी अर्पण संस्थेचे तज्ञ प्रशिक्षक सायली जाधव, सुशिल मोहिते,संकिता शिंदे, कोमल मधे,स्वप्निल गायकवाड, मनस्वी कुंडू,नितेश आग्रे,योगेश जावळे यांनी शिक्षकांना मार्गदर्शन केले. या प्रशिक्षणाची प्रत्यक्षपणे प्रभावी अंमलबजावणी जिल्हा परिषदेच्या मुख्य कार्यकारी अधिकारी अशिमा मित्तल,प्राथमिक शिक्षणाधिकारी नितीन बच्छाव, उपशिक्षणाधिकारी धनंजय कोळी,संशोधक सहाय्यक अनिता देशमुख,मिता चौधरी, गटशिक्षणाधिकारी अल्फा देशमुख, यशवंत रायसिंग,प्रमिला शेंडगे सह केंद्र प्रमुख, विस्तार अधिकारी यांनी प्रशिक्षण यशस्वीतेसाठी प्रयत्न केले. मुलांना वैय्यक्तिक सुरक्षा शिक्षण देण्यासाठी तुम्ही www.arpanelearn.com वेबसाइटला देखील भेट देऊ असे आवाहन अर्पण संस्थेने नागरिकांना केले आहे.

फोटो- बोरगाव, ता. सुरगाणा येथे प्रशिक्षणात सहभागी झालेले शिक्षक

१)प्रतिक्रिया-“बाल लैंगिक शोषण प्रतिबंध व उपाय या विषयावर या पुर्वी मन मोकळेपणाने विद्यार्थ्यांशी संभाषण, संवाद कसा साधावा. याबद्दल शिक्षकांच्या मनात कुठेतरी संकोच निर्माण होत असे. अर्पण या संस्थेने शिक्षकांना प्रशिक्षण दिल्यामुळे निश्चितच या विषयावर पालक, विद्यार्थी यांच्याशी संवाद साधता येईल.- रेशमा गायकवाड, प्रशिक्षणार्थी शिक्षिका

२) प्रतिक्रिया:
” अभ्यासक्रमात लैंगिक शिक्षणाचा समावेश करावा अगर करु नये. या बद्दल अनेक मतमतांतरे निर्माण झाल्याने तुर्तास तरी या विषयावर पडदा पडला आहे.मात्र त्याच अनुषंगाने अर्पण या सामाजिक संस्थेने ” बाल लैंगिक शोषण प्रतिबंध व उपाय “या विषयावर पालक व प्रौढांसाठी बाल लैंगिक शोषण व वैयक्तिक सुरक्षा तर विद्यार्थ्यांना वैयक्तिक सुरक्षा व शिक्षण यावर मार्गदर्शन केले जाणार आहे.अर्पण संस्थेचा स्तुत्य व प्रभावी कार्यक्रम असून निश्चितच शालेय आवारात, समाजात घडणाऱ्या बाल लैंगिक अत्याचाराच्या घटनांना आळा बसेल. विद्यार्थी वैयक्तिक सुरक्षा शिक्षणात सुरक्षित व असुरक्षित स्पर्श, नाही म्हणा व निघून जा, मदत मागा, मदत मिळे पर्यंत सांगत रहा, माझी चूक नाही.हे मुद्दे प्रभावी ठरणार आहेत.हे प्रशिक्षण सर्वच शाळेतील विद्यार्थी, पालक, शिक्षकांना देणे हि काळाची गरज आहे.यामुळे विद्यार्थी बोलके होतील व बाल लैंगिक अत्याचाराला प्रतिबंध आळा बसेल. शिक्षकांना हे प्रशिक्षण नवसंजीवनी ठरेल. – रतन चौधरी, प्रशिक्षणार्थी सहभागी शिक्षक

β⇔ दिव्य भारत बीएसएम न्यूज : मुख्य संपादक : डॉ. भागवत महाले : मो. 918208180510 

(‘दिव्य भारत बीएसएम न्यूज’ची बातमी शेअर व लाईक करा आणि सबस्क्राईब करा, बेल आयकॉन बटणवर प्रेस करा. ताज्या बातम्या व घडामोडी नियमित बघत राहा. “दिव्य भारत बीएसएम न्यूज” )