🅱️:चंद्रपूर :⇔राष्ट्रसंत तुकडोजी महाराजांच्या जीवनावर आधारित चित्रपट लवकरच साकारणार-आ.सुधीर मुनगंटीवार

🔊 Listen to this

राष्ट्रसंत तुकडोजी महाराजांच्या जीवनावर आधारित चित्रपट लवकरच साकारणार

आ. सुधीर मुनगंटीवार यांची अपार तळमळ आणि सांस्कृतिक कार्य मंत्री आशिष शेलार यांच्याशी विशेष चर्चा

β⇔ दिव्य भारत बीएसएम न्यूज वृत्तसेवा : नाशिक : सोमवार  : दि.17 मार्च  2025

🅱️⇔चंद्रपूर, दि.17 (प्रतिनिधी-):-राष्ट्रसंत तुकडोजी महाराज यांच्या महासमाधी स्थळाला ‘अ’ तीर्थक्षेत्र दर्जा मिळवून देण्यासाठी राज्याचे माजी वने, सांस्कृतिक कार्य व मत्स्यव्यवसाय मंत्री आमदार सुधीर मुनगंटीवार यांनी महत्त्वपूर्ण पुढाकार घेतला आहे. तसेच, नागपूर विद्यापीठाला राष्ट्रसंतांचे नाव देण्यासाठी विधिमंडळात आणि बाहेर यशस्वी लढा दिला. अलीकडेच त्यांनी सांस्कृतिक कार्य मंत्री आशिष शेलार यांची भेट घेतली आणि राष्ट्रसंतांच्या जीवनावर आधारित चित्रपटाच्या शासनादेशासंदर्भात चर्चा केली.
            राष्ट्रसंतांच्या विचारांचा प्रचार आणि सेवेसाठी समर्पित राहण्याचा संकल्प मुनगंटीवार यांनी पुन्हा अधोरेखित केला. समाजप्रबोधन, अंधश्रद्धा निर्मूलन, आणि राष्ट्रीय एकात्मतेचा संदेश देणारे राष्ट्रसंत तुकडोजी महाराज यांचे कार्य पुढील पिढीपर्यंत पोहोचावे, या उद्देशाने या चित्रपटाची निर्मिती होत आहे. सांस्कृतिक कार्य मंत्री आशिष शेलार यांनी लवकरच कार्यारंभ आदेश काढण्याचे आश्वासन दिले.
              राष्ट्रसंत तुकडोजी महाराज यांनी अंधश्रद्धा, जातीभेद निर्मूलन, समाजजागृती आणि देशभक्तीचा संदेश भजन-कीर्तनाच्या माध्यमातून दिला. १९४२ च्या “भारत छोडो” आंदोलनात त्यांचा सक्रिय सहभाग होता आणि त्यांना अटकही झाली होती. त्यांच्या प्रेरणादायी जीवन प्रवासावर आधारित हा चित्रपट तयार करण्यात येणार आहे.
          या चित्रपट निर्मितीसाठी सहाय्यक अनुदान देण्याची बाब शासनाच्या विचाराधीन होती. महाराष्ट्र शासनाने ऐतिहासिक, सामाजिक, आणि शैक्षणिक क्षेत्रातील थोर व्यक्तींच्या जीवनावर आधारित चित्रपट निर्मितीला प्रोत्साहन देण्यासाठी धोरण आखले आहे. त्यानुसार, राष्ट्रसंत तुकडोजी महाराज यांच्या जीवनावर आधारित चित्रपट निर्मितीस सहाय्यक अनुदान देण्यासाठी प्रशासकीय मान्यता मिळाली आहे.
            अभिनेत्री अलका कुबल यांच्याशी चर्चा करताना सुधीर मुनगंटीवार यांनी अचूक माहिती आणि दर्जेदार कलाकृती म्हणून हा चित्रपट पूर्णत्वास यावा, यासाठी पुढाकार घेण्याचे आवाहन केले.

β⇔ दिव्य भारत बी एस एम न्यूज : मुख्य संपादक : डॉ . भागवत महाले : मो. 918208180510 

(‘दिव्य भारत बीएसएम न्यूज’ची बातमी शेअर व लाईक करा आणि सबस्क्राईब करा, बेल आयकॉन बटणवर प्रेस करा. ताज्या बातम्या व घडामोडी नियमित बघत राहा. “दिव्य भारत बीएसएम न्यूज” )