🔊 Listen to this

चिराई घाटात भीषण अपघात: तीन ठार, एक गंभीर जखमी

β⇔दिव्य भारत बीएसएम न्यूज वृत्तसेवा : नाशिक : मंगळवार : दि.3 मे  2025

🅱️⇔ बोरगाव(नाशिक),दि.3 (प्रतिनिधी– लक्ष्मण बागुल ):- सुरगाणा तालुक्यातील चिराई घाटात मंगळवारी (दि.३) रोजी दुपारी तीन वाजता दुचाकीं (एमएच १५ एचई १२९९) ही बोरगाव कडून पगारबारी कडे जाताना तर (एमएच १५ एचडी ७१०३) देवलदरी येथून दरेगाव येथे जात असताना या दोन दुचाकींची समोरासमोर भीषण धडक झाली. अपघातात भास्कर मोरे (२२, रा. पंगारबारी, ता. सुरगाणा), मोहन लक्ष्मण पवार (२६, रा. देवलदरी, ता. सुरगाणा) व रोहिदास सुभाष गवळी (२५, रा. दरेगाव (ह) ता. कळवण) हे ठार झाले आहे. या अपघातात तीन जणांचा मृत्यू झाला असून, दिनेश मोढें (रा. पंगारबारी, ता. सुरगाणा) हा गंभीर जखमी झाला आहे. जखमी व्यक्तीस तातडीने नाशिक जिल्हा रुग्णालयात हलविण्यात आले आहे.
            सदर घटनेचे सविस्तर वृत्त असे आहे, की  मोहन पवार व त्याचा साला रोहीदास गवळी हे देवलदरी कडून कळवण तालुक्यातील दरेगाव येथील सासरवाडीकडे येत असताना तर भास्कर मोरे हे आपल्या गावाकडे जात असताना हा अपघात झाला आहे. अपघात एवढा जोरदार होता की दोन्ही दुचाकींचा अक्षरशः चक्काचूर झाला. स्थानिक नागरिकांनी तत्काळ धाव घेत मदतकार्य करत जखमीला १०८ वाहनात टाकण्यासाठी मदत केली.
            अपघाताचे कारण अद्याप स्पष्ट झाले नसले तरी अतिवेग आणि घाटातील वळणदार रस्ता हे कारणीभूत असल्याची प्राथमिक शक्यता वर्तवली जात आहे. याप्रकरणी सुरगाणा पोलीस ठाण्यात गुन्हा नोंदविण्यात आला आहे. या दुर्दैवी घटनेमुळे परिसरात हळहळ व्यक्त केली जात आहे. पंगारबारी येथील रहिवासी भास्कर मोरे हे शेती काम करत होते. त्यांच्या पश्चात आई, वडील, भाऊ, दोन बहिणी, पत्नी, दोन मुली असा परिवार आहे. तर देवलदरी येथील रहिवासी मोहन लक्ष्मण पवार हे शेती काम करत होते. त्यांच्या पश्चात आई, वडील, भाऊ, भाऊजयी, बहीण, पत्नी, एक मुलगा, एक मुलगी असा परिवार आहे. सुरगाणा तालुक्यात  वारंवार अश्या दुचाकींच्या  घटना होत असल्याने अनेक तरुण मुलांचा बळी गेला आहे. तरी प्रशासनाने घाट मार्गात वळण रस्ता आणि उंचवटे भाग काढून  सरळ रस्ता चांगला बनवण्यात यावा. स्वरक्षक भिंत दुतर्फा रस्ताला बांधण्यात यावे अशी मागणी नागरिकांनी केली आहे.