🔊 Listen to this

सत्यवान आणि सावित्रीचे प्रतिक “वटपौर्णिमा “आधुनिक युगातही मोठ्या श्रद्धेने  महाराष्ट्रभर साजरी,कुटुंब व्यवस्थेला बळकटी मिळणार !

β⇔दिव्य भारत बीएसएम न्यूज वृत्तसेवा : नाशिक : मंगळवार  : दि.10 जून  2025

🅱️⇔नाशिक,दि.10 (प्रतिनिधी– वैशाली महाले ):- नाशिक येथील शहरातील सर्वच  भागात सु‌वासिनींनी वडाच्या झाडाची पूजा करून पतीच्या दीर्घायुष्यासाठी साकडे घातले. परिसरात वडाच्या झाडांची पूजा करण्यासाठी आणि त्याला सूताचा धागा  बांधण्यासाठी महिलांनी आज सकाळपासूनच गर्दी केली होती. पती-पत्नीचे नाते सात जन्म टिकावे, यासाठी ज्येष्ठ पौर्णिमा अर्थात वटपौर्णिमेला वडाच्या झाडाची पूजा करून पतीच्या दीर्घायुष्यासाठी साकडे घालण्यात आले. म्हसरूळ , बोरगड , मेरी , मखमलाबाद, गंगापूर  परिसरात वडाच्या झाडांची पूजा करण्यासाठी आणि त्याला सूताचा धागा बांधण्यासाठी महिलांनी आज सकाळपासूनच गर्दी केली होती. म्हसरूळ येथील साईबाबा मंदिर येथे हजारो महिलांनी आज दिवसभर वडाच्या झाडांची पूजा करण्यात आली. याप्रसंगी श्रीमती  प्रतिभा चौधरी , श्रीमती वैशाली महाले , श्रीमती नीता मोहन, श्रीमती ललिता मोहन, श्रीमती भारती महाले, श्रीमती सुनिता वाघेरे आदींनी वडाच्या झाडांची पूजा सूताचा धागा बाधून केली. 

         या सणाच्या आख्यायिकेनुसार, सत्यवान आणि सावित्री या दाम्पत्याच्या आयुष्यात आलेला एक दिवस म्हणून वटपौर्णिमा आधुनिक युगातही तितक्यात पारंपरिक पध्दतीने साजरी केली जात आहे. हिंदू धर्मातील सण, प्रथा, परंपरा या निसर्गाच्या संस्कृतीशी जोडल्या गेल्या आहेत. जन्मोजन्मी हाच पती मिळावा. यासाठी वटपौर्णिमेला विवाहित महिला वटवृक्षाच्या मुळाशी पाणी शिंपून आणि बुंध्याला सुताचे सात फेरे घालतात. ही परंपरा पिढ्यानपिढ्या चालत आलेली आहे.
         या परंपरेप्रमाणे वटवृक्ष असलेल्या ठिकाणी वटवृक्षाची पूजा करण्यासाठी महिला मोठ्या प्रमाणात गर्दी करतात. वडाच्या वृक्षाचे आयुष्य जास्त असते. तसेच त्याच्या पारंब्यांचा विस्तारही खूप मोठा होतो. त्याचप्रमाणे नैसर्गिकतः दीर्घायुष्य लाभलेल्या वडाच्या वृक्षाप्रमाणे आपल्या पतीला आणि कुटुंबीयांना आरोग्य संपन्न दीर्घायुष्य लाभावे, हा त्यामागचा हेतू आहे.                               दरम्यान  म्हसरूळ , बोरगड , मेरी , मखमलाबाद, गंगापूर , जूने नाशिक ,सिडको , इंदिरानगर , पाथर्डी , आडगाव , परिसरात सकाळपासूनच सुवासिनींमध्ये पूजेची लगबग सुरू झाली होती. साजशृंगार करून हातामध्ये पूजेचे ताट घेऊन परिसरातील महिलांनी वडाच्या झाडाला सात फेरे मारून वडाच्या झाडाची मनोभावे पूजा केली. आंबे, केळी, फुले, हळद-कुंकू साहित्याने वडाची पूजा करत सुवासिनींनी जन्मोजन्मी हाच पती लाभो, अशी प्रार्थना केली, यावेळी  महिलांनी एकमेकींना हळदी-कुंकू लावून आंब्याचे वाण दिले.

β⇔ दिव्य भारत बीएसएम न्यूज : मुख्य संपादक : डॉ. भागवत महाले : मो. 918208180510 

(‘दिव्य भारत बीएसएम न्यूज’ची बातमी शेअर व लाईक करा आणि सबस्क्राईब करा, बेल आयकॉन बटणवर प्रेस करा. ताज्या बातम्या व घडामोडी नियमित बघत राहा. “दिव्य भारत बीएसएम न्यूज” )