🔊 Listen to this

पत्नीच्या क्रूरतेचा कळस ! पतीची कु-हाडीने हत्या करून प्रेत शोषखड्ड्यात पुरले !  तब्बल दोन महिन्यांनी उघडकीस आले; भयाण सत्य

β⇔दिव्य भारत बीएसएम न्यूज वृत्तसेवा : नाशिक : शनिवार : दि.14 जून 2025

🅱️⇔पळसण(सुरगाणा),दि.14 (प्रतिनिधी– हिरामण चौधरी ):-सुरगाणा तालुक्यातील मालगोंदा येथे पत्नीने पतीची कु-हाडीने हत्या करून प्रेत तब्बल दोन महिन्यांपर्यंत घरातील शौचालयाच्या शोषखड्ड्यात पुरल्याची संतापजनक घटना उघडकीस आली आहे. ही घटना संपूर्ण जिल्ह्यात खळबळ माजवणारी ठरत आहे.
                  खूनाची पद्धत, लपवणूक आणि संशयाचा उलगडा : मयत यशवंत मोहन ठाकरे (वय ४२) हे दिनांक १४ एप्रिल २०२५ पासून बेपत्ता होते. त्यांच्या पत्नीने – प्रभावती यशवंत ठाकरे (वय ३८) – सासऱ्यांना सांगितले की ते कामानिमित्त बिलीमोरा, गुजरात येथे गेले आहेत. त्यानंतर प्रभावती स्वतःही कामासाठी तिकडे गेली होती. मात्र पावसाळा सुरू होऊनही यशवंत परत न आल्याने कुटुंबियांना संशय येऊ लागला.
         ओसरीवरील संशयास्पद खड्डा आणि चप्पलांच्या साक्षीने उलगडले रहस्य : घराच्या ओसरीवर लावलेली माती पाहून यशवंतचे वडील मोहन ठाकरे यांनी संशय बळावला. प्रभावतीविरुद्ध पोलिस ठाण्यात तक्रार दाखल करण्यात आली. पहिल्या टप्प्यात पोलिसांनी खड्ड्याचा पंचनामा केला; मात्र काही पुरावा हाती लागला नाही. प्रभावतीने गुन्हा फेटाळल्याने ती मुक्त होती. काही दिवसांनी यशवंतचा भाऊ उत्तम याची पत्नी मेथी हिने प्रभावतीच्या वागणुकीतील विसंगती ओळखून संशय व्यक्त केला. तिने घराच्या मागे असलेल्या पडलेल्या शौचालयाच्या शोषखड्ड्याकडे लक्ष वेधले. उत्तम ठाकरेने संध्याकाळी पाहणी केली असता दुर्गंधी व कुजलेल्या वस्तूंचा वास येत होता. खड्डा उकरल्यानंतर प्रेताचे अवशेष दिसून आले. तात्काळ पोलिसांना माहिती देण्यात आली.

प्रभावतीची कबुली आणि पोलिस तपास :

          चौकशीत प्रभाने अखेर गुन्ह्याची कबुली दिली. कु-हाडीच्या फाशाने डोक्यावर वार करून यशवंतची हत्या केल्याचे मान्य केले आहे,  मृतदेहाचे तीन तुकडे करून गोण्यांमध्ये भरून, त्यावर माती, मुरुम, प्लास्टिक व फॉरेट टाकून शोषखड्ड्यात पुरण्यात आले होते.
तपासाची पुढील दिशा – कोणी मदत केली का? : प्रभावती हिचे माहेर डांग सीमेजवळील शिलोटमाळ येथे आहे. एवढे मोठे काम  एकटीने शक्य आहे का, तिला मदत मिळाली का, याचा तपास सध्या सुरू आहे.
घटनास्थळी अधिकारी आणि फॉरेन्सिक टीम दाखल: तपास पोलिस निरीक्षक राहुल मोरे, नायब तहसीलदार मोहन कुलकर्णी,              पो.उप.निरीक्षक अण्णासाहेब दिघे यांच्या मार्गदर्शनाखाली पो.काँ. पंडित खिरकाडे, संदीप पगारे, रमेश चव्हाण व फॉरेन्सिक टीम नाशिक काम करत आहे. शवविच्छेदन ग्रामीण रुग्णालयाचे वैद्यकीय अधिकारी डॉ. शुभम परदेशी यांनी घटनास्थळीच केले.

कुटुंबाची हकिकत :

        मयत यशवंत ठाकरे यांच्या पश्चात पत्नी (आरोपी), एक मुलगा, आई-वडील व भाऊ असा परिवार आहे.   घटना ग्रामीण भागात स्तंभित करणारी आहे. पत्नीनेच पतीचा इतक्या निर्दयी पद्धतीने खून करून दोन महिने प्रेत घरात लपवणे – ही बाब समाजाच्या सद्य:स्थित मानसिकतेवर गंभीर प्रश्नचिन्ह निर्माण करते.

β⇔ दिव्य भारत बीएसएम न्यूज : मुख्य संपादक : डॉ. भागवत महाले : मो. 918208180510 

(‘दिव्य भारत बीएसएम न्यूज’ची बातमी शेअर व लाईक करा आणि सबस्क्राईब करा, बेल आयकॉन बटणवर प्रेस करा. ताज्या बातम्या व घडामोडी नियमित बघत राहा. “दिव्य भारत बीएसएम न्यूज” )